Rydyn ni wedi diweddaru ein Polisi Preifatrwydd a Chwcis
Rydyn ni wedi gwneud newidiadau pwysig i'n Polisi Preifatrwydd a Chwcis ac rydyn ni eisiau i chi wybod beth all hyn ei olygu i chi a'ch data.
Hawl i addol-dai Cymru ailagor 'ond dim angen rhuthro'
Ffynhonnell y llun, Rawpixel
Gall eglwysi yng Nghymru ailagor ar gyfer addoliad cyhoeddus o'r wythnos nesaf (Sul 19 Gorffennaf) ymlaen wedi i Lywodraeth Cymru lacio'r cyfyngiadau ymhellach brynhawn Gwener.
Mae Cytûn (Eglwysi ynghyd yng Nghymru) a'r Eglwys yng Nghymru wedi dweud eu bod yn croesawu'r newyddion ond yn ychwanegu y bydd canllawiau pellach yn cael eu dosbarthu ddechrau wythnos nesaf.
Eisoes roedd yna ganiatâd i agor addol-dai ar gyfer gweddïau preifat, priodasau ac angladdau.
Ar gyfer addoliad cyhoeddus bydd yn rhaid sicrhau fod pellter o ddau fetr rhwng pobl a "sicrhau protocolau digonol ar gyfer hylendid a glanhau".
Rhai eglwysi methu ailagor
Bydd yn ofynnol hefyd i eglwysi a chapeli gwblhau asesiad risg cyn agor eu drysau.
O ganlyniad fydd hi ddim yn bosib i bob eglwys ailagor, medd llefarydd ar ran yr Eglwys yng Nghymru, gan y bydd yn rhaid dibynnu ar wirfoddolwyr i fod ar gael i fonitro ymbellhau cymdeithasol ac i sicrhau y caiff eglwysi eu cadw'n lân.
Mewn datganiad dywedodd yr Eglwys yng Nghymru: "Mae ymagwedd bwyllog at ailagor, sydd wedi'i seilio'n gadarn ar ganllawiau Llywodraeth Cymru, yn hanfodol.
"Yr hyn a gyhoeddwyd yw rhoi caniatâd. Nid oes unrhyw ofyniad, gan Lywodraeth Cymru nac Esgobion yr Eglwys yng Nghymru, i ailagor ar hyn o bryd.
"Er ein bod i gyd yn ymlawenhau y gallwn yn awr ddychwelyd i addoli yn ein heglwysi, rydym yn annog eglwysi lleol i beidio rhuthro i ailagor.
"Dim ond os gallwch wneud hynny'n effeithlon ac yn ddiogel o fewn y canllawiau y dylech ystyried ailagor."
Ffynhonnell y llun, stevanovicigor
Mewn neges ar eu cyfrif twitter dywedodd Cytûn fod hyn yn "newyddion da i addol-dai ond bod canllawiau i ddod."
Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen Twitter a cyn derbyn. Er mwyn gweld y cynnwys dewiswch ‘derbyn a pharhau’.
Diwedd neges Twitter
Ychwanegodd John Davies, Archesgob Cymru: "Mae hyn yn newyddion da hir-ddisgwyliedig a rydym yn ein groesawu ac mae'n arwydd ein bod ar ein ffordd i sicrhau adferiad o'r pandemig wrth i'r cyfyngiadau symud gael eu llacio.
"Ond ni allwn fod yn hunanfodlon nac yn ddifater. Mae'n rhaid i ni symud yn bwyllog ac yn ofalus a bydd addoliad yn wahanol i'r hyn yr ydym wedi arfer ag ef yn y gorffennol.
"Hoffwn ddiolch i'r rhai fydd yn gwneud paratoadau i'w hadeiladau fod ar agor - bydd yn golygu cryn dipyn o waith a rhoi sylw i ganllawiau technegol iawn.
"Ond diolch i chi am wneud yr ymdrech - caiff yr hyn a wnewch ei werthfawrogi'n enfawr gan y rhai nad ydynt hyd yma wedi medru cymryd rhan mewn addoliad gydag eraill."
