´óÏó´«Ã½

Mae tîm rygbi'r Llewod wedi cadarnhau y bydd y daith i Dde Affrica yn digwydd yn 2021.

Bydd y Llewod yn chwarae tair gêm brawf yn erbyn y Springboks, sy'n bencampwyr y byd, er gwaethaf yr ansicrwydd yn sgil y pandemig.

Fe fydd pum gêm arall yn rhan o'r daith, gan gychwyn yn erbyn y Stormers yn Cape Town ar 3 Gorffennaf y flwyddyn nesaf.

Fe fydd y tair gêm brawf yn Johannesburg ar 24 Gorffennaf, Cape Town ar 31 Gorffennaf ac yn ôl i Johannesburg ar gyfer y prawf olaf ar 7 Awst.

Dywedodd Ben Calveley, cyfarwyddwr y Llewod: "Mae'r pandemig Covid-19 wedi achosi llawer o amharu ar y calendr chwaraeon, ond yn dilyn trafodaethau helaeth gallwn gadarnhau y bydd y daith yn digwydd.

"Mae llawer iawn o drefnu angen ei wneud i roi taith y Llewod at ei gilydd, felly roedd yn hanfodol ein bod wedi cytuno ar benderfyniad yn brydlon.

"Rwy'n falch iawn ein bod wedi gallu rhoi rhywfaint o eglurder i'r holl gefnogwyr y Llewod fydd yn awyddus i deithio i Dde Affrica yr haf nesaf."

Mae'r Llewod wedi teithio i Dde Affrica 13 tro yn y gorffennol, gan ennill pedair cyfres, colli wyth ac un yn gyfartal.