´óÏó´«Ã½

Mae sinemâu yng Nghymru yn annhebygol o ailagor yr wythnos nesaf oherwydd cyfyngiadau ar sut y gallan nhw weithredu, yn ôl cymdeithas sy'n cynrychioli'r diwydiant.

Dywedodd Phil Clapp, Prif Weithredwr Cymdeithas Sinema'r DU mai "ychydig, os o gwbl" fydd yn ailagor ar 27 Gorffennaf pan fydd y cyfyngiadau'n cael eu codi.

Fydd dim hawl gan sinemâu werthu unrhyw fwyd os ydyn nhw'n ailagor ar y dyddiad hwnnw ac fe fydd rheolau ymbellhau'n gymdeithasol yn dal mewn grym.

Dywedodd llefarydd ar ran Llywodraeth Cymru eu bod yn gweithio gyda'r gymdeithas.

Mae sinema'r Maxime yn y Coed Duon, Sir Caerffili yn un o'r sinemâu na fydd yn ailagor ddydd Llun, ond mae sinema Brynaman yn bwriadu ailagor yn gynnar mis Awst.

Mae gan y Maxime bum sgrîn a digon o le i 232 o bobl yn y theatr mwyaf, ond dim ond 60 fydd yn cael mynediad o achos y rheol 2m.

Dywedodd Steve Reynolds, cyfarwyddwr Picturedrome Cinemas sy'n rhedeg y Maxime: "Os oes rhaid i ni ostwng ein capasiti a dim modd gwerthu bwyd, yna dyw hi ddim yn ymarferol i ni agor.

"Rwy'n credu y galla i siarad dros fwyafrif sinemâu Cymru, y cwmnïau mawr hefyd. Er efallai y byddwn ni'n gallu ymdopi a chynulleidfa lai - fydden ni ddim yn dymuno gwneud hynny - ond os oes rhaid i ni, efallai byddai hynny'n un dewis, ond o ran y gwerthiant bwyd a thocynnau, os ewch â'r ddau i ffwrdd, yna fyddwn ni ddim yn gallu goroesi."

Mae sinema'r Maxime yn cyflogi 37 o staff, ac erbyn hyn maen nhw'n ysu i ailagor.

"Rydych chi'n gweld busnes fel hwn sydd wedi bod ar gau ers pedwar mis, mae'n anodd iawn." ychwanegodd.

"Heb gynllun ffyrlo'r llywodraeth rwy'n credu y byddai wedi bod yn amhosibl parhau a chadw ein staff.

"Daeth cyhoeddiad am y celfyddydau a sinemâu annibynnol, sef cronfa o £1.5bn. Ond dy'n ni ddim wedi cael unrhyw wybodaeth am hynny eto - er ein bod wedi holi.

"Rydyn ni'n barod i ailagor os yw'r rheolau cywir yn eu lle. Mae'r staff mor awyddus i ddychwelyd i'r gwaith."

Ond nid pob sinema fydd yn parhau ar gau yn hir. Mae Sinema Brynaman yn gobeithio ailagor ar 7 Awst.

Un o gyfarwyddwyr y sinema yw Brian Harries, ac fe ddywedodd: "Ar ôl cyfarfod bore ma gyda'r cyfarwyddwyr, ni wedi penderfynu ailagor ar y 7fed o Awst.

"Bydde wedi bod yn dda agor yn gynt ond does dim ffilms i ddangos ond o'r 7fed mlaen byddwn ni yn dangos ffilms.

"Fe fydd y gwaith paratoi wedi ei wneud i gyd. Ma gyda ni ddigon o sanitisers a ni wedi rhannu y lle mas. Mae'r sinema fel arfer yn gallu dal 700 ond gyda rheolau dim ond 76 fydd yn gallu dod mewn i wylio ffilm.

"Mae gyda ni stafell gyda sgrîn llai sydd yn gallu cael 44 i mewn. O dan y cyfyngiadau dim ond 10 fydd yn gallu bod yno ac felly ni wedi penderfynu agor y stafell na i deuluoedd sydd eisiau gweld ffilm eu hunain."

Ychwanegodd Mr Harries: "Ni yn edrych mlaen i gael agor nawr."

Bydd rhai sinemau yn dangos ffilmiau oedd yn y sinema cyn iddyn nhw gau, fel Onward ac 1917. Mae sinemau wedi cael mynediad i archif o 450 ffilm i'w dewis tra bod yr amserlen ar gyfer ffilmiau newydd yn cael ei drefnu.

Bydd ffilmiau newydd yr haf yn cynnwys:

10 Gorffennaf: Saint Frances - ffilm gomedi annibynnol, gyda Kelly O'Sullivan yn y brif rhan, sef nani 34 oed sy'n gwneud dewisiadau amheus.

10 Gorffennaf: Dreambuilders - ffilm wedi animeiddio am ferch sy'n methu rheoli ei breuddwydion

31 Gorffennaf: Proxima - Eva Green yw'r unig fenyw sy'n hyfforddi i fod yn ofodwr, ac mae Matt Dillon yn cyd-serennu

31 Gorffennaf: Unhinged - Russell Crowe yn gwylltio fel nad yw e wedi gwylltio erioed o'r blaen wrth fynd ar drywydd mam oedd wedi meiddio canu corn ei char

12 Awst: Tenet - Blockbuster Christopher Nolan lle mae John David Washington yn ceisio atal Trydydd Rhyfel Byd

21 Awst: Mulan - Ailgread Disney o'r ffilm oedd wedi'i animeiddio yn 1998 am ferch fach o Cheina ddaeth yn ryfelwr

Mae disgwyl twr o ffilmiau yn yr Hydref, wedi'r cyfnod hir o oedi cyn medru eu rhyddhau oherwydd y feirws.

Mae Cymdeithas Sinema'r DU (UKCA) yn amcangyfrif bod 95% o weithwyr sinemâu yn y DU wedi cael eu rhoi ar ffyrlo, ac roedd amheuaeth am ryddhau ffilmiau newydd o achos natur fyd-eang y diwydiant.

Cymru yw'r unig ran o'r DU lle nad yw sinemâu wedi ailagor eto.

Mae Phil Clapp, prif weithredwr Cymdeithas Sinema'r DU wedi bod yn siarad gyda Llywodraeth Cymru am y rheolau presennol, ac mae'n credu y bydd yn annhebygol y bydd pobl yng Nghymru yn mynd i'r sinema yr wythnos nesaf.

"Yn amlwg dydyn ni ddim wedi siarad â phob sinema yng Nghymru, ond rydyn ni'n amau ​​mai ychydig, os o gwbl, fydd yn teimlo y byddan nhw'n gallu agor bryd hynny," meddai.

Dywedodd llefarydd ar ran Llywodraeth Cymru: "Rydyn ni'n gweithio gyda sinemâu ar fater gwerthu bwyd a diod fel rhan o ailagor lletygarwch dan do [a all agor o 3 Awst]."

"Rydyn ni'n archwilio opsiynau o amgylch pecyn o gymorth cyllid i'r sector diwylliant."