´óÏó´«Ã½

Bydd sêr Hollywood Ryan Reynolds a Rob McElhenney yn rhannu eu gweledigaeth ar gyfer Wrecsam gydag aelodau o Ymddiriedolaeth Cefnogwyr y clwb ddydd Sul.

Mae Mr Reynolds a Mr McElhenney eisiau cymryd perchnogaeth o'r clwb sydd yn y Gynghrair Genedlaethol.

Byddant yn nodi eu cynlluniau ar gyfer y clwb mewn cyfarfod rhithiol ar ôl i 95% o aelodau'r Ymddiriedolaeth bleidleisio o blaid cynnal trafodaethau gyda'r ddau.

Byddant hefyd yn ateb cwestiynau cefnogwyr yn ystod y cyfarfod ar-lein.

Gallai unrhyw gytundeb posib arwain at fuddsoddiad o £2m yn y clwb, sydd wedi bod ym mherchnogaeth cefnogwyr ers 2011.

Bydd mwy na 2,000 o aelodau'r Ymddiriedolaeth yn pleidleisio ar ddyfodol y clwb, ac er mwyn i'r penderfyniadau gael eu cymeradwyo rhaid i 75% o'r aelodau bleidleisio o blaid.

Mae aelodau'r Ymddiriedolaeth eisoes wedi derbyn pecynnau pleidleisio sydd yn cynnwys manylion ar gamau nesaf y cais gan y cwmni, sy'n dwyn yr enw 'The R.R McReynolds Company'.

Bydd aelodau'n gallu pleidleisio o ddydd Llun, 9 Tachwedd hyd at ddydd Sul, 15 Tachwedd, ac mae disgwyl penderfyniad y diwrnod canlynol.