´óÏó´«Ã½

Mae byrddau iechyd Aneurin Bevan a Bae Abertawe wedi gweld y nifer fwyaf o farwolaethau Covid-19 ers diwedd Ebrill, yn ôl y ffigyrau diweddaraf.

Ar draws Cymru cafodd 256 o farwolaethau'n ymwneud â Covid-19 eu cofnodi yn yr wythnos hyd at 18 Rhagfyr - 33 yn fwy na'r wythnos flaenorol.

Coronafeirws oedd achos 29% o'r holl farwolaethau yng Nghymru yn ôl y Swyddfa Ystadegau Gwladol (ONS).

Mae cyfanswm o 4,479 o farwolaethau yn gysylltiedig â Covid-19 wedi cael eu cofnodi yng Nghymru bellach.

Roedd 63 o farwolaethau yn ardal Bwrdd Iechyd Aneurin Bevan dros yr wythnos honno - 52 o'r rheiny mewn ysbytai a saith mewn cartrefi gofal.

Cofnodwyd 61 o farwolaethau gan Fwrdd Iechyd Bae Abertawe - 43 mewn ysbytai a 13 mewn cartrefi gofal.

Fe wnaeth nifer y marwolaethau gynyddu yn ardal Cwm Taf Morgannwg hefyd, i 49.

Mae'r ffigyrau hefyd yn dangos mai Rhondda Cynon Taf, sydd wedi gweld 610 o farwolaethau bellach, sydd â'r gyfradd farwolaethau uchaf yng Nghymru a Lloegr.

Mae nifer y marwolaethau ledled Cymru 22.8% yn uwch na'r cyfartaledd dros y bum mlynedd ddiwethaf.

Mae'r marwolaethau sy'n cael eu cofnodi gan y Swyddfa Ystadegau Gwladol yn cynnwys unrhyw farwolaeth ble mae meddygon yn credu bod Covid-19 yn ffactor.

Yn wahanol i ffigyrau Iechyd Cyhoeddus Cymru, maen nhw'n cynnwys pobl sydd wedi marw gyda Covid-19, ond oedd heb gael prawf.