´óÏó´«Ã½

Mae gobaith i'r diwydiant twristiaeth yng Nghymru am y flwyddyn i ddod, er gwaethaf effaith "ddinistriol" pandemig Covid-19, yn ôl perchnogion busnes.

Dangosodd data Llywodraeth Cymru fod lefelau ymwelwyr ym mhob sector o'r diwydiant twristiaeth wedi gostwng yn ddramatig yn 2020.

Fodd bynnag, ym mis Awst a mis Medi, pan nad oedd y cyfyngiadau ar eu llymaf, roedd cyfraddau ymwelwr yn y mwyafrif o sectorau yn debyg neu'n well nag yn y ddwy flynedd flaenorol.

Dywedodd Llywodraeth Cymru ei bod wedi neilltuo £180m i gefnogi twristiaeth.

Yn ôl y data, roedd 66% o ystafelloedd gwestai yn llawn yn 2018 a 2019 , ond gostyngodd y nifer hon i 39% ar gyfartaledd rhwng mis Mawrth a mis Medi 2020 o ganlyniad i gyfyngiadau cloi.

Cafodd busnesau sydd heb gyfleusterau sy'n rhai eu rhannu ailagor eto ar 11 Gorffennaf, gan arwain at atgyfodiad yn y ffigurau dros fisoedd yr haf.

Ym mis Awst a mis Medi, roedd cyfraddau ymwelwyr mewn gwestai yn 71% a 67%, sydd yn is na chyfartaleddau'r ddwy flynedd flaenorol o 78% a 75%, ond yn llawer nes at dymor nodweddiadol.

A chofnododd llety hunanarlwyo a gwely a brecwast gyfraddau deiliadaeth uwch dros y ddau fis hynny yn 2020 nag yn y ddwy flynedd flaenorol.

Tymor 'ffynnianus' yr haf

Dywedodd Lynette Esposito, sy'n berchen ar Westy'r Elm Tree yn Llandudno, Conwy, fod 2020 wedi bod yn "hollol ofnadwy", a bod effaith y pandemig wedi bod yn "ysgytwol" ac yn "ddinistriol" i'w busnes.

Ychwanegodd, nid yn unig fod y gwesty wedi methu sicrhau busnes am ei fod wedi cau, ond ei fod hefyd wedi ysgwyddo costau rhedeg ychwanegol er mwyn cadw at y rheoliadau.

"Rwy'n credu, gyda'r cyfyngiadau a'r canllawiau y mae'n rhaid i ni eu dilyn, ei fod yn bendant wedi cael effaith ar sefydliadau lle byddai'ch gwasanaeth yn dod â phobl at ei gilydd yn awtomatig mewn un ystafell," meddai Ms Esposito.

"Cynyddodd y costau. Ni allem wneud ein bwffe agored arferol. Gan ein bod yn westy roedd yn rhaid i chi gymryd mwy o ofal wrth sicrhau bod pawb yn ddiogel, gan gofio bod llawer mwy o fannau cyffredin - mae gennym lifft, bar a lolfa."

Ond er gwaethaf cau pedair o'r 14 ystafell yng Ngwesty'r Elm Tree i helpu gyda phellter cymdeithasol, dywedodd Ms Esposito fod busnes yn well na'r arfer ar ôl ailagor.

"Fe gaethon ni ddau fis llawn a oedd yn fywiog iawn ac yn gryf iawn ... roedd Awst a Medi'n well na'r flwyddyn flaenorol."

Dywedodd fod y cynnydd hwn yn y galw ddiwedd yr haf y llynedd yn argoeli'n dda ar gyfer y flwyddyn i ddod, ar yr amod bod cyfyngiadau yn caniatáu gwyliau yn y DU dros yr haf.

"Rwy'n credu pan fyddwn yn cael agor y byddwn yn gweld cynnydd sylweddol yn y galw," meddai.

"Rwy'n credu y byddwn ni'n cael tymor da iawn. Mae pobl yn ysu am gael mynd allan eto ac rwy'n credu y bydd defnyddwyr yn elwa o hynny."

Fe wnaeth Llywodraeth Cymru gynnal arolwg o fusnesau o chwe sector gwahanol o'r diwydiant twristiaeth.

O'r rheini, cofnododd llety hunan-arlwyo a gwestai bach gyfraddau ymwelwyr uwch ym mis Awst a mis Medi nag yn 2018 a 2019.

Dim ond ychydig dros hanner o gartrefi carafanau sefydlog oedd yn llawn ym mis Awst, ond wrth iddyn nhw fod 92% yn llawn ym mis Medi, cofnododd y sector hwn gyfraddau uwch nag yn yr un mis yn 2018 a 2019.

Cofnododd parciau carafanau a gwersylla teithiol ffigyrau ychydig yn is, tra gwelodd hosteli ostyngiadau sylweddol yn nifer yr ymwelwyr.

Mae gwersylla yn sector arall sydd wedi cael ei daro'n wael gan y pandemig, yn enwedig ar gyfer safleoedd sy'n defnyddio cyfleusterau sy'n cael eu rhannu.

Dywedodd perchennog maes pebyll Broadstone, sydd ar ddwy ochr y ffin rhwng Sir Fynwy a Swydd Gaerloyw, ei fod yn "ffyddiog" ar gyfer tymor 2021 er gwaethaf blwyddyn anodd yn 2020.

"Cafodd [y cyfnod clo] effaith niweidiol arnom ni," meddai Jeff Revill.

"Pan oeddem ar agor, roedd yn dda, roeddem yn eithaf prysur hyd yn oed pan oedd rhai cyfyngiadau ar waith o hyd. Mae'n debyg i ni mai'r cyfyngiadau wnaethon ni eu cyflwyno ein hunain wnaeth ein hatal rhag gwneud hyd yn oed mwy o fusnes.

"Wnaethon ni ddim llenwi'r maes gwersylla i'w gapasiti llawn. Roedd hi'n fis Awst da ond gallen ni fod wedi gwneud mwy."

Mae cwmnïau gwyliau'r DU wedi dweud bod disgwyl i arosiadau gynyddu'n sylweddol yn 2021 ar ôl i'r cyfnod clo ddod i ben.

Dywedodd llefarydd ar ran Llywodraeth Cymru: "Rydym wedi ymrwymo i wneud popeth o fewn ein gallu i amddiffyn busnesau yn ystod yr amser heriol hwn.

"Ein pecyn cymorth yw'r mwyaf hael yn y DU ac mae mwy na £1.7bn o gymorth ariannol Llywodraeth Cymru wedi cyrraedd busnesau ar draws pob sector ers mis Mawrth.

"Mae arian eisoes yn cyrraedd busnesau twristiaeth, lletygarwch a hamdden o'r gronfa sector-benodol gwerth £180m a agorodd ddydd Mercher 13 Ionawr."