´óÏó´«Ã½

Mae'r heddlu wedi enwi'r dyn gafodd ei ganfod yn farw ar stryd yng Nghaerdydd nos Iau.

Mae marwolaeth Tomasz Waga, 23 oed, yn cael ei drin gan Heddlu'r De fel achos o lofruddiaeth.

Cafodd corff Mr Waga ei ganfod gan aelod o'r cyhoedd yn Westville Road, Penylan, ddydd Iau tua 23:30.

Mae ei deulu wedi talu teyrnged iddo gan ddweud bod "nifer o bobl yn ei garu ac mae wedi cael ei gymryd oddi wrthym ni'n rhy gynnar".

"Rydyn ni wedi ein llorio gan ei farwolaeth sydyn ac rydyn ni'n gofyn i unrhyw un sydd â gwybodaeth i ddod ymlaen," meddai'r teulu mewn datganiad.

"Bydd yn byw yn ein calonnau am byth a bydd yn cael ei gofio fel y mab, brawd, tad a phartner dymunol yr oedd."

Dywedodd y Ditectif Brif Arolygydd Mark O'Shea, sy'n arwain yr ymchwiliad, fod Mr Waga wedi teithio o ardal Dagenham yn Llundain ddydd Iau i gyfeiriad ar Ffordd Casnewydd.

"Credwn fod aflonyddwch wedi digwydd tua 22:30 yn y lleoliad hwn, pan yr ymosodwyd arno.

"Mae ymholiadau'n parhau i sefydlu sut y daeth i fod yn Westville Road lle cafodd ei ddarganfod."

Ychwanegodd fod tua 80 o swyddogion a staff yn gweithio ar yr ymchwiliad ac "rydym yn ddiolchgar am yr ymateb gan y cyhoedd hyd yn hyn".

Ond mae'r llu yn awyddus i siarad ag unrhyw un a oedd yn ardaloedd Ffordd Casnewydd a Westville Road neu'n gyrru drwodd rhwng 22:00 a hanner nos ddydd Iau, 28 Ionawr.

Mae Heddlu'r De wedi sefydlu ystafell ddigwyddiadau yng Ngorsaf Heddlu Ganolog Caerdydd.