´óÏó´«Ã½

Mae angen ailddatblygu tref Shotton er mwyn mynd i'r afael ag ymddygiad gwrthgymdeithasol yn yr ardal, yn ôl yr awdurdod lleol.

Bydd cabinet Cyngor Sir y Fflint yn trafod cynnig i lunio uwchgynllun i'r ardal mewn cyfarfod dydd Mawrth.

Yn ôl arweinydd y cyngor, Ian Roberts, mae angen syniadau "realistig ac uchelgeisiol" i gymuned sydd â "phroblemau rydym angen gweithio i'w datrys".

Byddai gan y cynllun meistr gyfres o amcanion ar gyfer y tymor byr, canol a hir, fydd yn llywio datblygiad yr ardal am y pump i 10 mlynedd nesaf.

Hefyd, gallai prosiectau eraill yn y cylch ddod yn rhan o'r cynllun ehangach.

Mae menter gymunedol eisoes wedi bod yn gweithio i adnewyddu adeilad eiconig gwaith dur John Summers dros y blynyddoedd diwethaf ond wedi wynebu nifer o rwystrau, gan gynnwys fandaliaeth.

Noda'r cynnig sy'n mynd gerbron cynghorwyr bod ymddygiad gwrthgymdeithasol ar gynnydd yn y cylch.

"Dros y blynyddoedd diwethaf, mae'r cyngor ac aelodau lleol wedi derbyn nifer cynyddol o gwynion a sylwadau am ymddygiad gwrthgymdeithasol a phroblemau amgylcheddol fydd, os na chawn nhw eu datrys, yn niweidio'r ardal ac yn tanseilio ymdrechion lleol i gadw'r dref yn lân a thaclus," meddai'r ddogfen.

Os bydd cabinet y sir yn cymeradwyo'r cynnig, bydd y gwaith o lunio'r cynllun yn mynd rhagddo, gyda'r nod o gyflwyno cynlluniau pendant yn ystod yr haf.