´óÏó´«Ã½

Mae pob rhan o Gymru wedi gweld cynnydd yn nifer y cerbydau ar y ffyrdd yn yr wythnosau diwethaf o'i gymharu â'r cyfnod clo cyntaf yng ngwanwyn 2020.

Mae ffigyrau Traffig Cymru a Llywodraeth Cymru yn datgelu bod swm y traffig wedi bron dyblu mewn rhai ardaloedd.

Dros y chwe wythnos ddiwethaf mae cynnydd o 62% wedi bod yn nifer y cerbydau ar ffyrdd Cymru o'i gymharu â chwe wythnos gyntaf y cyfnod clo cyntaf.

Mae hynny er bod y cyfyngiadau coronafeirws yn debyg iawn, gyda phobl yn cael eu cynghori i deithio os ydy hynny'n angenrheidiol yn unig.

Casnewydd welodd y cynnydd lleiaf yn swm y traffig, gydag ychydig dros 30% yn fwy o gerbydau ar yr M4 yno.

Ond fe wnaeth gweddill de Cymru weld cynnydd llawer mwy.

O edrych ar y ffigyrau ar gyfer y gogledd a'r canolbarth, mae nifer y cerbydau ar y ffyrdd wedi bron dyblu yng Nghonwy, ac mae cynnydd mawr i'w weld ym mhob ardal.

Daw'r cynnydd wedi i'r ffyrdd fod yn dawel iawn dros y Nadolig - dyma oedd y cyfnod tawelaf trwy gydol 2020.

Mae swm y traffig ar hyn o bryd yn debyg i'r lefelau a welwyd ym mis Mehefin 2020 pan oedd y cyfyngiadau llymaf wedi'u llacio.

Dywedodd John Parkinson, pennaeth seicoleg ym Mhrifysgol Bangor, ei fod yn cydnabod fod pobl yn blino ar gyfnodau clo, ond ei fod yn credu bod awydd y cyhoedd i gadw at y rheolau yn parhau'n "hynod o uchel".

Ond ychwanegodd, wrth i gyfraddau brechu gynyddu, bod perygl y gallai pobl gredu "mae'n rhaid ei bod hi'n ddiogel rŵan".

"Rwy'n dychmygu y gallai hynny gael effaith negyddol ar gydymffurfio â'r rheolau," meddai.

Un gwahaniaeth mawr sy'n cael ei weld ledled Cymru ydy'r gostyngiad mawr yn nifer y bobl sy'n defnyddio trafnidiaeth gyhoeddus, gyda gostyngiad o dros 60% mewn nifer o ardaloedd.

Ond mae'n bosib bod yr awydd i osgoi trafnidiaeth gyhoeddus hefyd yn rhannol gyfrifol am y cynnydd yn nifer y cerbydau ar y ffyrdd.

Dywedodd Stuart Cole, athro trafnidiaeth ym Mhrifysgol De Cymru, ei fod yn credu y byddai'r negeseuon am osgoi trafnidiaeth gyhoeddus yn cael effaith ar niferoedd teithwyr am flynyddoedd i ddod.

"Rydych chi'n gwrando arnyn nhw [y llywodraeth] pan maen nhw'n dweud bod yn rhaid i chi aros gartref, peidio teithio ar drafnidiaeth gyhoeddus - mae trafnidiaeth gyhoeddus yn berygl," meddai.

"Bydd hynny ym meddyliau pobl am beth amser."