´óÏó´«Ã½

Bydd galw ar etholwyr i fynd â phennau a phensiliau eu hunain i'r blychau pleidleisio ar gyfer etholiadau 2021.

Daw hyn yn dilyn datganiad ar y cyd gan lywodraethau'r DU, Cymru a'r Alban fel rhan o ganllawiau i wneud y broses o bleidleisio yn fwy diogel yn ystod y pandemig.

Dywed gweinidogion y dylai unrhyw un sy'n gyfforddus wrth siopa mewn archfarchnad fod yn hyderus wrth ddefnyddio gorsafoedd pleidleisio.

Y bwriad yw cynnal etholiadau Senedd Cymru ar 6 Mai.

Fe fydd etholiadau ar gyfer comisiynwyr heddlu a throsedd yn cael eu cynnal ar yr un diwrnod.

Dywed datganiad ar y cyd gan y llywodraethau y bydd etholwyr yn cael eu "hannog i ddod a phennau neu bensiliau eu hunain er mwyn bwrw eu pleidlais, er y bydd pensiliau glan ar gael i bawb".

"Cyn hir fe fydd etholwyr yn derbyn eu cardiau pleidleisio ar gyfer yr etholiadau a byddwn yn hoffi eu sicrhau fod yna baratoadau eang yn cael eu gwneud i sicrhau fod y bleidlais yn cael ei chynnal mewn modd sy'n lleihau'r risg o ledaenu coronafeirws."

Fe fydd hylif hylendid ar gael, a bydd sgriniau hefyd yn cael eu defnyddio ynghyd ag arwyddion i gadw pellter cymdeithasol.

"Fe ddylai pobl - pleidleiswyr a staff y gorsafoedd - wisgo mwgwd."

Fe fydd modd i bobl hefyd bleidleisio trwy'r post neu benodi dirprwy.

Fe fydd modd defnyddio pleidlais ddirprwy, lle mae etholwr yn dewis rhywun i bleidleisio ar eu rhan, tan 17:00 ar ddiwrnod yr etholiad.

"Golygai hyn y gallai etholwyr sy'n hunan-ynysu oherwydd canlyniad prawf covid neu symptomau, barhau i allu pleidleisio heb orfod gadael eu cartrefi," meddai'r gweinidogion yn y datganiad."

Ar hyn o bryd mae yna waharddiad ar ddosbarthu pamffledi gwleidyddol yn ystod y cyfnod clo yng Nghymru.

Mae gweinidog iechyd Cymru Vaughan Gething wedi dweud ei fod yn ystyried llacio'r rheol yma.

Yn ddiweddar fe wnaeth Senedd Cymru basio deddfwriaeth a fyddai'n caniatáu i ddyddiad yr etholiad gael ei ohirio pe bai angen oherwydd effeithiau'r pandemig.