´óÏó´«Ã½

Mae'r awyrennau masnachol cyntaf ers misoedd wedi gadael Cymru ddydd Mawrth, wedi cyfnod hir o hediadau angenrheidiol yn unig.

Fe wnaeth hediad o Gaerdydd i Malaga adael y tir am 09:15 fore Mawrth er i'r Prif Weinidog ddweud ei bod yn "well osgoi" teithio dramor oni bai fod angen.

Mae system goleuadau traffig mewn grym ar gyfer teithio dramor, sy'n rhoi gwledydd mewn tri chategori gwahanol yn seiliedig ar sefyllfa Covid-19 yno.

Mae'n bosib y bydd mwy o deithio dramor yn cael ei ganiatáu dros yr wythnosau nesaf, ond mae hynny'n ddibynnol ar y sefyllfa yn y DU, yn enwedig gyda'r amrywiolyn o India.

Doedd llefarydd ar ran Maes Awyr Caerdydd, sydd dan berchnogaeth Llywodraeth Cymru, ddim am ddatgelu faint o deithwyr oedd ar yr hediad Vueling i Malaga am bod y wybodaeth yn "fashachol sensitif".

Mae Sbaen ar restr oren llywodraethau Cymru a'r DU sy'n golygu y bydd yn rhaid i deithwyr hunan-ynysu am 10 ddiwrnod ar ôl dychwelyd.

Dywed prif weithredwr Maes Awyr Caerdydd, Spencer Birns eu bod "ar agor ac yn barod i groesawu cwsmeriaid yn ôl i'r maes awyr dros y misoedd nesaf".

Ychwanegodd eu bod "yn parhau i ddilyn canllawiau'r Llywodraeth ac yn cydweithio'n agos gydag Iechyd Cyhoeddus Cymru i gadw diogelwch ein tîm ac ein cwsmeriaid yn brif flaenoriaeth".

Mae'r cyfyngiadau ar deithio yng Nghymru wedi bod yn cael eu llacio yn raddol dros yr wythnosau diwethaf, ac mae Mark Drakeford wedi dweud y byddai'r mwy o lacio wedi digwydd oni bai am y pryderon am yr amrywiolyn newydd.

Cyn gwyliau'r Pasg fe wnaeth y rheolau ar deithio o fewn Cymru newid, gan olygu bod pobl wedi cael gadael eu hardal leol am y tro cyntaf ers misoedd, gan gynnwys i fynd ar wyliau.

Ddydd Llun yma cafodd pob math o lety gwyliau yng Nghymru ganiatâd i ailagor.

Cyngor Llywodraeth y DU, o 17 Mai, ydy y gall pobl o Loegr fynd ar wyliau tramor i nifer cyfyngedig o wledydd, ond mae Llywodraeth Cymru'n dweud na ddylai pobl teithio dramor oni bai ei fod yn angenrheidiol.

Dywedodd Mr Drakeford na ddylai pobl "deimlo'n euog" am deithio dramor, ond mae wedi annog pobl i gymryd eu gwyliau o fewn ffiniau Cymru am y tro.

Mae gwledydd yn cael eu rhoi i un o dri chategori - gwyrdd, oren neu goch.

Mae hyn yn seiliedig ar sefyllfa Covid-19 yno, ac mae'n rhaid i bobl ddilyn rheolau gwahanol wrth ddychwelyd o wahanol gategorïau.

Yn wahanol i Loegr, does dim modd cael prawf ar y pumed diwrnod yng Nghymru er mwyn lleihau'r cyfnod ynysu pan yn dychwelyd o wlad categori oren.

O 24 Mai bydd modd i bobl yng Nghymru wneud cais i brofi eu bod wedi cael dau ddos o frechiad Covid-19 os oes angen teithio ar frys i wlad sy'n ei gwneud yn ofynnol am dystiolaeth bod ymwelwyr wedi cael eu brechu.

Ychwanegodd Spencer Birns o Faes Awyr Caerdydd: "Mae cwmnïau hedfan yn adolygu eu rhaglenni teithio yn gyson, ac rydyn ni'n annog cwsmeriaid i wirio gyda'u cwmni am y diweddaraf ar eu taith a gwirio canllawiau diweddaraf y llywodraeth ar deithio i ac o Gymru," meddai.