´óÏó´«Ã½

Cafodd un farwolaeth yn gysylltiedig â Covid-19 ei chofnodi yng Nghymru yn yr wythnos hyd at 25 Mehefin, yn ôl y Swyddfa Ystadegau Gwladol.

Yr wythnos flaenorol ni chafodd yr un farwolaeth ei chofnodi, a hynny am y tro cyntaf ers dechrau'r pandemig.

Mae ffigyrau marwolaethau Covid-19 yn parhau'n isel yng Nghymru gyda phedair marwolaeth yn gysylltiedig â'r haint wedi'u cofrestru yn y pedair wythnos ddiwethaf.

Ni fu marwolaeth Covid-19 o gwbl mewn pedair ardal bwrdd iechyd yn ystod y mis diwethaf - Caerdydd a'r Fro, Cwm Taf Morgannwg, Hywel Dda a Bae Abertawe.

Yn ôl y Swyddfa Ystadegau, hyd at 25 Mehefin bu farw 7,900 o bobl gyda Covid-19 ar eu tystysgrif marwolaeth yng Nghymru ers dechrau'r pandemig.

Yn ôl ymchwiliad gan raglen Newyddion S4C, cafodd chwarter y rhai sydd wedi marw o Covid-19 yng Nghymru eu heintio yn yr ysbyty.

Roedd 1,860 - neu 24.4% - o'r rhai fu farw gyda Covid-19 ar eu tystysgrif marwolaeth rhwng dechrau'r pandemig a 1 Mai eleni "yn sicr" neu'n "debygol" o fod wedi eu heintio yn yr ysbyty.

Mae ffigyrau'r Swyddfa Ystadegau Gwladol hefyd yn dangos bod cyfanswm y marwolaethau o unrhyw achos yn is na'r cyfartaledd dros y pum mlynedd ddiwethaf.

Mae'r ffigyrau yma, yn wahanol i rai Iechyd Cyhoeddus Cymru, yn cynnwys achosion ble mae meddygon yn amau bod Covid wedi cyfrannu at y farwolaeth, hyd yn oed os nad ydy'r person wedi cael prawf - gan gynnwys marwolaethau sydd wedi digwydd yng nghartrefi pobl, cartrefi gofal a hosbisau.

Dim ond achosion ble mae claf wedi cael prawf positif am Covid-19 sy'n cael eu cyfrif yn ffigyrau Iechyd Cyhoeddus Cymru, ond mae'r data hynny yn cael ei ddiweddaru yn fwy cyson.