´óÏó´«Ã½

Mae beiciwr proffesiynol o Abertawe wedi ei henwi fel "un i'w gwylio" yn y byd seiclo.

Mae sgiliau Eluned King, 19, wedi'u cydnabod yng nghylchgrawn seiclo The British Continental ac mae'n cael ei hystyried ymhlith y goreuon o dan 23 oed yn y Deyrnas Unedig.

"Mae'r holl bwysau fi'n cael, mae'n dod o fi fy hunan," meddai Eluned.

"I fod yn un i'w gwylio o fewn Prydain, ma' hwnna yn massive, achos ma' Prydain yn massive yn y byd seiclo."

Mae Eluned yn hyfforddi ym Manceinion ac yn rhan o uwch academi seiclo Prydain. Ei gobaith yw cystadlu yng Ngemau'r Gymanwlad flwyddyn nesaf yn Birmingham.

'Pwysau ar fy hunan i berfformio'

Dechreuodd Eluned ei gyrfa seiclo gyda chlwb seiclo Towy Riders yng Nghaerfyrddin pan yn blentyn ifanc. Treuliodd ei phlentyndod yn hyfforddi gyda'i brodyr a'i chwaer yn yr ardal a gydag amser fe ddenodd ei thalent naturiol sylw hyfforddwyr.

Yn ôl Eluned, mae harddwch yr ardal a defnydd o'r iaith Gymraeg yn y clwb wedi ei hysbrydoli hi i hyfforddi ar hyd y blynyddoedd.

Ddiwedd Mehefin eleni fe enillodd Eluned y Grand Prix yn Otley yn Sir Gorllewin Efrog, fel rhan o dîm Breeze.

"Fi'n rhoi lot o bwysau ar fy hunan i berfformio," meddai Eluned.

"Mae'n galed gyda'r holl ansicrwydd sydd yn y byd ar y foment."

Ar ôl cwblhau ei chyrsiau safon uwch yn Ysgol Gyfun Gŵyr, fe gafodd Eluned wahoddiad i symud i fyw a hyfforddi ym Manceinion. Doedd y penderfyniad ddim yn un hawdd, meddai, ond wedi ei llwyddiant yn ddiweddar mae hi'n fwy hyderus.

"Allen i 'di jest mynd 'o, wel, 'nai fynd i'r brifysgol. 'Nai ddilyn y llwybr arferol'," meddai.

"Mae'n bizarre achos dwi'n siarad â ffrindiau ac maen nhw nawr yn y brifysgol neu dal yn y chweched. Ma' 'da fi basically swydd llawn amser a mwy."

Er gwaethaf heriau amlwg y pandemig i Eluned a'i thîm, mae'r cyfnod wedi cynnig cyfleoedd unigryw iddi o safbwynt hyfforddi.

"I fi roedd e [y pandemig] yn bositif. Fi'n teimlo bach yn euog am ddweud 'na achos obviously roedd y cyfnod clo yn galed i bawb am resymau rili gwahanol," meddai.

"Nath e roi cyfle i fi 'neud be' o'n i moyn 'neud heb unrhyw bwysau o rasio neu'r ysgol. Fi'n meddwl oedd e wedi gweithio yn dda i fi achos roedd e fel steppingstone i be' fi'n 'neud nawr."

I Eluned, mae'r cyfle i seiclo yn broffesiynol yn freuddwyd.

"Dyw e ddim eich typical swydd 9-5 ond fi'n ennill arian a fi'n rili joio fe. Mae e yn freuddwyd fel swydd."

Yr hyn sydd yn bwysig iddi yw cydraddoldeb, a sicrhau bod gan ferched gyfleoedd yn y dyfodol.

"Pan o'n i yn tyfu lan roedd pawb o'n i yn edrych lan i ddynion - o'dd y bobl o'n i yn gwylio yn rasio yn ddynion," meddai.

"Ma' na newid mor gloi. Mae 'na fwy o fenywod ar y lefel uchaf. Ma' ffordd bell i fynd ond mae hi wedi newid mor gloi yn y pum mlynedd ddiwethaf."

Gyda Chymru yn dathlu llwyddiant mawr yn y Gemau Olympaidd yn Tokyo eleni, mae Eluned yn gobeithio y bydd ei henw hi yn cael sylw yn y dyfodol.

"Fel Cymraes ma' Gemau'r Gymanwlad flwyddyn nesaf yn darged mawr."