´óÏó´«Ã½

Mae prif weinidogion Cymru, yr Alban a Gogledd Iwerddon wedi galw ar Boris Johnson i wrthdroi ei gynllun i dorri credyd cynhwysol.

Mae'r Canghellor Rishi Sunak yn cynllunio i atal yr £20 ychwanegol y mae pobl wedi bod yn derbyn yn ystod y pandemig ym mis Tachwedd.

Mewn llythyr i'r Prif Weinidog, dywedodd arweinwyr y llywodraethau datganoledig bod y toriad yn cael ei weithredu wrth i'r DU wynebu "argyfwng sylweddol costau byw".

Dywedodd Llywodraeth y DU mai mesur dros dro oedd y taliad ychwanegol o £20.

Yn ôl yr Is-ysgrifennydd Gwladol David TC Davies mae'r llywodraeth yn bwriadu helpu pobl "mewn ffyrdd eraill."

Mae 5.5 miliwn o deuluoedd yn hawlio credyd cynhwysol yn y DU.

Cafodd y taliad o £20 ychwanegol ei ymestyn gan chwe mis ym mis Mawrth, er i'r Canghellor fynnu mai ond mesur dros dro oedd e.

Ond mae ASau o bob plaid yn ogystal ag elusennau ac ymgyrchwyr wedi galw ar Lywodraeth y DU i barhau i ddarparu'r taliad trwy gydol tymor yr hydref.

Cafodd y llythyr ei arwyddo gan Brif Weinidog Cymru Mark Drakeford, Prif Weinidog yr Alban Nicola Sturgeon, a Phrif Weinidog ac Is-brif Weinidog Gogledd Iwerddon Paul Givan a Michelle O'Neill.

'Argyfwng costau byw'

Dywedon nhw yn y llythyr "nad oedd unrhyw reswm am dorri cefnogaeth mor bwysig ar adeg pan mae pobl ar draws y DU yn wynebu straen digynsail ar eu cyllid".

"Rhaid i ni sicrhau bod anghenion ein poblogaeth fwyaf bregus yn cael eu hystyried," dywedodd y llythyr.

"Nid yw'n rhy hwyr i chi wrthdroi'r penderfyniad i gymryd arian allan o bocedi pobl dlotaf y gymdeithas yn ystod adeg pan maen nhw'n wynebu argyfwng difrifol costau byw."

'Dydy'r arian ddim gyda ni'

Yn siarad ar Raglen Dewi Llwyd ar ´óÏó´«Ã½ Radio Cymru ddydd Sul, dywedodd yr Is-ysgrifennydd Gwladol ac AS Ceidwadol Mynwy David TC Davies ei fod yn cefnogi penderfyniad Llywodraeth Prydain i dynnu nôl y cynnydd o £20 i bobl ar gredyd cynhwysol, er gwaetha'r feirniadaeth gan arweinwyr y gwledydd datganoledig.

"'Dan ni wedi gwneud lot i sicrhau fod pobl yn gwella a bod y minium wage yn mynd fyny," meddai.

"Mae miliwn o vacancies ledled Prydain. 'Dan ni wedi dweud ein bod ni wedi rhoi pres ychwanegol yn y pandemig ond hefyd yn dweud fod o methu parhau - dydy'r arian ddim gyda ni".

"Mae pawb yn sylweddoli bod ni methu cario mlaen am byth ond 'dan ni am helpu mewn ffyrdd eraill.

"Dylai neb orfod dewis rhwng bwyd a gwres".