´óÏó´«Ã½

Cyfartal oedd y gêm rhwng Cymru a'r Weriniaeth Tsiec yng ngrŵp rhagbrofol Cwpan y Byd 2022, er bod Cymru wedi llawn haeddu ei hennill.

Er i Gymru agor y sgorio, bu'n rhaid iddyn nhw frwydro i sicrhau pwynt oddi cartref yn yr ail hanner wedi i gamgymeriad trychinebus arwain at gôl i'w rwyd ei hun gan y golwr, Danny Ward.

Y capten Aaron Ramsey a Dan James wnaeth sgorio goliau Cymru mewn gêm hynod gyffrous, sy'n golygu bod y Weriniaeth Tsiec yn parhau'n ail yng Ngrŵp E gyda'r un nifer o bwyntiau â Chymru sy'n aros yn y drydedd safle.

Mae'r golygon nawr yn troi at gêm nos Lun oddi cartref yn Estonia, a gurodd Belarws 2-0 nos Wener.

Roedd yna ddechrau tanllyd yn Stadiwm Sinobo, Prague ac arwyddon cynnar y byddai'r gêm yn cael ei dyfarnu'n llym.

Roedd yna gardyn melyn i Ramsey yn y funud gyntaf am daro chwaraewr gyda'i benelin wrth godi i geisio penio'r bêl. Cafodd Dan James rybudd bron yn syth wedi hynny am gicio'r bêl o'r maes wedi dyfarniad ei fod yn gamsefyll.

Fe arbedodd Danny Ward ddau ymgais addawol gan Adam Hlozek a Patrik Schick, cyn ymdrech gwirioneddol cyntaf Cymru ar y gôl - cyfle da i Kieffer Moore o bàs James. Ond efallai bod James wedi aros eiliad yn rhy hir cyn croesi gan roi amser i'r golwr ddod yn agosach ar yr ymosodwr ac o ganlyniad fe darodd Moore y bêl yn syth ato.

Aeth Cymru ar y blaen wedi 35 o funudau - fe gyffyrddodd croesiad Neco Williams ben James ac fe laniodd y bêl wrth draed Ramsey ar ochr chwith y cwrt. Fe gymrodd ei amser, a dau gyffyrddiad i reoli'r bêl i'w wthio'n isel ar ongl eithaf tynn i gornel dde'r rhwyd.

Ond fe barodd y fantais gwta funud. Manteisiodd Jacub Pesek ar hanner arbediad gan Ward a bwlch rhwng tri o amddiffynwyr Cymru i ddod â'r tîm cartref yn gyfartal.

1-1 oedd y sgôr wedi hanner cyntaf campus ac roedd sawl rheswm i'r hyfforddwr Robert Page fod yn falch o berfformiad ei dîm.

Ond cafodd unrhyw foddhad ei chwalu'n deilchion yn dilyn y gôl a roddodd y Weriniaeth Tsiec ar y blaen dair munud wedi'r egwyl.

Pan y pasiodd Ramsey'r bêl yn ôl i'w golwr, roedd yn ymddangos bod Ward heb ragweld y posibilrwydd y byddai'n mynd i'r rhwyd. Ymatebodd yn hamddenol, gan geisio'i rheoli gyda'i draed ond fe gyfeiriodd y bêl dros y llinell.

Fe gollodd Cymru fomentwm am gyfnod, ac roedd y dorf wedi tawelu.

Roedd hynny cyn ymdrechion gan Moore a Ramsey i geisio taro'n ôl - a chyn i Harry Wilson a Connor Roberts ddod i'r maes yn lle Joe Morrell a Chris Gunther.

Fe wnaeth yr eilyddio wahaniaeth. Pàs wych gan Wilson wnaeth gyrraedd James a darodd y bêl ar draws y cwrt o'r dde i gornel chwith y rhwyd i'w gwneud hi'n 2-2 - ei gôl ryngwladol gyntaf oddi cartref.

Cynyddu'r pwysau ar eu gwrthwynebwyr wnaeth Cymru wedi hynny, gydag ymdrechion addawol gan Ramsey, Wilson, Moore a Roberts.

Ond roedd angen gwaith amddiffynnol cryf hefyd, gan gynnwys gan Sorba Thomas a ddaeth i'r maes yn lle Neco Williams ar gyfer ei gêm ryngwladol gyntaf.

Parhau i bwyso tan eiliad olaf yr amser ychwanegol wnaeth Cymru ond 2-2 oedd y sgôr terfynol.