´óÏó´«Ã½

Fe allai plant sy'n creu fideos TikTok ar dir ysgol mewn dwy sir yn y gogledd gael eu gwahardd o'r dosbarth.

Mae cynghorau sir Conwy a Dinbych wedi ysgrifennu at rieni yn rhybuddio y gallai'r heddlu gael eu galw mewn rhai achosion.

Daw yn sgil pryderon bod plant yn dilyn esiamplau eraill ar yr ap rhannu fideos, ac yn creu deunydd anaddas.

Ymhlith y fideos sy'n cael eu rhannu mae rhai yn annog plant i daro athrawon neu ddifrodi adeiladau'r ysgol.

Mae rhai yn creu cyfrifon ysgol ffug ac yn rhannu deunydd anaddas arnynt.

Mae'r cynghorau wedi gofyn i rieni edrych ar gyfryngau cymdeithasol eu plant a sicrhau fod unrhyw ddeunydd perthnasol wedi ei ddileu.

"Yn amlwg rydyn ni'n deall fod plant yn defnyddio'r cyfryngau cymdeithasol, ond dydyn ni ddim am i unrhyw un ddioddef oherwydd hyn," meddai'r Cynghorydd Huw Hilditch-Roberts o Gyngor Sir Ddinbych.

"Rydyn ni'n cefnogi ein hysgolion uwchradd ac yn pwysleisio i ysgolion gynradd na ddylai plant mor ifanc a saith fod ar TikTok."

Dywedodd y Cynghorydd Julie Fallon, Aelod Cabinet Addysg Cyngor Bwrdeistref Sirol Conwy:

"Yn amlwg dydy hi ddim yn addas i recordio pobl heb iddyn nhw wybod, ac os taw dyma'r math o beth sy'n digwydd, rydw i'n cefnogi ysgolion wrth iddynt fynd i'r afael â hyn.

"Mae'r cyfyngau cymdeithasol yn broblem barhaus i'n cymdeithas. Rydw i'n ddiolchgar fy mod i wedi tyfu lan heb ffôn symudol a phan nad oedd cyfryngau cymdeithasol yn broblem."

Yn eu llythyr at rieni, dywedodd y cynghorau y byddai ysgolion yn parhau i fonitro'r cyfryngau cymdeithasol dros yr wythnosau nesaf ac yn gweithredu lle mae'n briodol.