´óÏó´«Ã½

Mae Gweinidog Economi Cymru, Vaughan Gething yn dweud ei fod yn aml yn cael ei holi os yw'n aelod o staff mewn bwytai, a'i fod yn credu bod hynny oherwydd lliw ei groen.

"Pe bawn i'n ddyn gwyn wedi gwisgo'n eithaf smart yn mynd i le fel yna, fyddai pobl ddim yn gofyn hynny," meddai.

Mae'r gweinidog wedi cyfrannu at lyfr newydd, 100 Black Voices on Racism.

Dywedodd yr actores Suzanne Packer o Gaerdydd, wnaeth helpu i olygu'r llyfr, ei fod mewn ymateb i lofruddiaeth George Floyd yn yr Unol Daleithiau.

Ychwanegodd Ms Packer, sydd wedi ymddangos mewn dramâu fel Casualty, Doctor Who ac Un Bore Mercher, mai ei gobaith yw y bydd y llyfr yn arwain at bobl yn cael "sgyrsiau anghyffyrddus".

Yn trafod ei brofiadau ei hun, dywedodd Mr Gething wrth ´óÏó´«Ã½ Cymru fod "pobl yn cymryd 'mod i'n aelod o staff - nid rhywun sydd yno i fwyta mewn bwyty gyda fy ngwraig".

"Mae wedi digwydd yn ddigon aml," meddai.

Dywedodd y cyn-Weinidog Iechyd ei bod yn anodd delio gyda rhagfarn ddiarwybod.

"Mae 'na lot o bobl sy'n edrych fel fi fydd wedi cael amryw o ddigwyddiadau tebyg yn eu bywydau," meddai.

Aeth ymlaen i ddweud ei fod yn gorfod cael trafodaethau anodd gyda'i fab oherwydd lliw eu croen.

"Rydw i eisiau cael trafodaeth arferol gyda fy mab, ond y broblem yw nad yw'n sgwrs arferol i orfod dweud wrth eich plentyn nad yw'r byd yn deg oherwydd y ffordd ry'ch chi'n edrych," meddai.

Dywedodd Ms Packer ei bod yn gobeithio fod y llyfr yn dangos fod cyfranwyr wedi ffynnu er gwaethaf agweddau hiliol.

Mae hi hefyd yn ddarlithydd yn y Coleg Cerdd a Drama yng Nghaerdydd, ble mae hi'n gobeithio defnyddio ei phrofiadau i helpu myfyrwyr du, Asiaidd neu o leiafrifoedd ethnig eraill.

"Fe wnes i adael i'n hun deimlo 'mod i ddim angen bod mor uchelgeisiol oherwydd nad oedd digon o rolau ar gyfer pobl oedd yn edrych fel fi," meddai.

"Pwy a ŵyr pa gyfleoedd y gallwn i fod wedi'u cael os na fydden i wedi cael y meddylfryd yna.

"Rwy'n gwybod sut beth yw hi i fod yr unig berson yn y cast sydd ddim yn wyn.

"Rwy'n agored iawn i fyfyrwyr sydd eisiau dod ata i ac egluro beth yw eu pryderon. O'r safbwynt hynny rwy'n credu bod gen i ran bwysig i'w chwarae."