´óÏó´«Ã½

Mae hyd at 500 o bobl bellach yn cael mynychu digwyddiadau awyr agored yng Nghymru wrth i gyfyngiadau ddechrau llacio wedi ton Omicron.

Dyma'r newid cyntaf yn y camau mae Llywodraeth Cymru'n eu cymryd i symud yn gyfan gwbl i lefel rhybudd sero o fewn pythefnos.

Ddydd Sadwrn cafodd y newid gryn groeso gan glybiau chwaraeon a rhedwyr parkrun.

Dywedodd Karl Johnson, o Bontypridd, bod rhedeg parkrun o les i'r corff a'r meddwl a bod cael cynnal y "digwyddiad unwaith eto yn rhyddhad i nifer".

O'r penwythnos nesaf bydd y cyfyngiadau ar dorfeydd mewn gemau chwaraeon yn cael eu codi'n llwyr, gan olygu y gall torfeydd llawn ddychwelyd i stadiymau ar bob lefel.

Roedd yna groeso hefyd yn Llanrwst gyda'r llacio yn golygu bod Clwb Rygbi Nant Conwy wedi gallu croesawu cefnogwyr yn erbyn Bethesda.

"Mae cefnogaeth y dorf yn gwneud gwahaniaeth mawr i'r chwaraewyr ar y cae ac mae'n dod â'r elfen o gymuned yn ôl i'r clwb," meddai'r cadeirydd Glesni Jones.

"Mae wedi bod yn anodd cynllunio'r cyfan ond mae wedi bod yn wych cael pawb yn ôl," ychwanegodd.

Un arall oedd yn falch o fod nôl oedd Nerys Ellis, 70 - roedd ei gŵr yn un o sefydlwyr y clwb ac mae eu mab yn chwarae i'r tîm.

"Mae'r clwb yn golygu llawer iawn i'r gymuned," meddai, "gyda phlant mor ifanc â saith oed ac aelodau o'r tîm cyntaf yn mwynhau eu hunain."

Yn ei gynhadledd i'r wasg ddydd Gwener, dywedodd y prif weinidog Mark Drakeford fod y newidiadau'n bosib am fod y don o achosion Omicron a welwyd dros gyfnod y Nadolig wedi dechrau cilio bellach.

Fe wnaeth clybiau pêl-droed Wrecsam a Chasnewydd gadarnhau nad oedd y newid wedi dod yn ddigon buan i'w galluogi gael cefnogwyr yn eu gemau cartref y penwythnos yma, ac roedd clwb pêl-droed Caerdydd a rhanbarth rygbi'r Gweilch ymysg y timau proffesiynol eraill oedd yn chwarae gartref ddydd Sadwrn.

Ond roedd modd i dimau lled-broffesiynol ac ar lawr gwlad fanteisio ar y newidiadau - yn eu plith, RGC 1404, a oedd yn croesawu Caerdydd yn yr unig gêm yn Uwch Gynghrair Rygbi Cymru'r penwythnos yma.

Mewn datganiad ar eu gwefan nos Wener dywedodd y clwb eu bod nhw'n "falch o allu croesawu 500 o gefnogwyr" i Barc Eirias ym Mae Colwyn ar gyfer yr ornest ddydd Sadwrn, gyda thocynnau'n mynd ar sail cyntaf i'r felin.

"Rydyn ni'n eich annog i gyrraedd yn gynnar er mwyn osgoi siom, achos unwaith bydd y tocynnau wedi eu gwerthu fe fyddwn ni'n cau giatiau'r stadiwm," meddai'r clwb.

Ychwanegodd Russell Everett, cadeirydd clwb cefnogwyr RGC 1404, fod llawer o gefnogwyr wedi gweld eisiau gallu mynd i gemau dros wyliau'r Nadolig a bod croeso mawr i'r cyhoeddiad.

"Fel arfer 'dyn ni'n cael torf o tua 800-1,200, felly mae unrhyw gynnydd [i'r nifer a ganiateir] yn newyddion da," meddai.

"Dwi'n falch, ond hefyd dwi'n gweld pam bod Cymru wedi bod yn ofalus a synhwyrol o ran y cyfyngiadau."

Ychwanegodd ei fod yntau, fel nifer o gefnogwyr eraill oedd gyda thocynnau i wylio Cymru yn y Chwe Gwlad, wedi poeni pan oedd sôn y gallai'r gemau cartref gael eu symud i Loegr os nad oedd cefnogwyr yn cael dychwelyd erbyn hynny.

"Roeddwn i'n bryderus iawn - doeddwn i ddim am fynd os oedden nhw'n symud y gemau i Loegr," meddai. "Ond gobeithio nawr bod hwnna wedi ei sortio."

Fydd cynghreiriau pêl-droed y Cymru Premier, Cymru North a Cymru South ddim yn ailddechrau nes y penwythnos nesaf, pan fydd torfeydd yn ôl yn llawn, a hynny ar ôl gohirio gemau ers Dydd San Steffan yn sgil y cyfyngiadau.

Ond fe gafodd nifer o gemau chwaraeon ar lefel is eu cynnal ddydd Sadwrn - yn eu plith gêm gyfeillgar CPD Llanuwchllyn yn erbyn Treffynnon.

Mae cadeirydd y clwb, Dei Charles Jones, yn croesawu'r newid i'r rheolau.

"Dan ni'n hapus iawn bod y cyfyngiadau 'di mynd oddi arnon ni," meddai. "Er dwi'm yn meddwl gawn ni fwy na 500 yn Llanuwchllyn!"

Dywedodd fod y clwb yn gefnogol o benderfyniad Cymdeithas Bêl-droed Cymru i ohirio gemau cystadleuol tra bod y cyfyngiadau mewn lle, gan fod cynnal gemau heb dorf yn gallu bod yn gostus i glybiau.

"Mae swyddogion gêm yn costio ryw £200 y gêm i ni heb sôn am gostau eraill, felly colli arian bob gêm fysa ni heb dorf yn cael dod yma," meddai.

"Mae'r tîm yn mynd yn dda tymor yma - gobeithio rŵan allwn ni orffen y tymor heb dim chwaneg o gemau'n cael eu galw i ffwrdd."