´óÏó´«Ã½

Mae dyn 20 oed wedi marw a dyn 57 oed yn yr ysbyty mewn cyflwr difrifol yn dilyn gwrthdrawiad yng Ngwynedd.

Cafodd Heddlu Gogledd Cymru eu galw i'r digwyddiad ar y B4354 rhwng Nefyn a'r Ffôr ychydig cyn 13:30 ddydd Sadwrn.

Roedd y gwrthdrawiad rhwng dau gar - BMW X3 glas a Ford Fusion du.

Dywedodd yr heddlu y bu farw'r dyn 20 oed, a bod y dyn 57 oed wedi cael ei gludo i ysbyty yn Stoke gydag anafiadau sy'n peryglu ei fywyd.

Mae teuluoedd y ddau yn derbyn cefnogaeth swyddogion arbenigol.

Mae Heddlu'r Gogledd yn apelio ar dystion neu unrhyw un sydd â gwybodaeth am y digwyddiad i gysylltu â'r llu.