´óÏó´«Ã½

Mae Cymru wedi colli am y tro cyntaf ym Mhencampwriaeth Chwe Gwlad y Merched eleni, wrth i dîm gorau'r byd sicrhau buddugoliaeth gyfforddus yng Nghaerdydd.

Er y canlyniad, roedd hi'n berfformiad addawol gan Gymru am rannau helaeth o'r hanner cyntaf, yn pwyso yn aml ac yn amddiffyn yn gadarn.

Hon hefyd oedd y dorf fwyaf erioed i wylio merched Cymru mewn gêm gartref, gyda 8,862 o bobl yn gwylio ym Mharc yr Arfau.

Felly roedd 'na ddigon i Gymru fod yn falch ohono ddydd Sadwrn, er gwaethaf y golled, ond mae'n dangos fod cryn dipyn o ffordd i fynd er mwyn cystadlu gyda'r goreuon.

Cafodd Cymru ddechrau gwych gan ddangos amddiffyn cadarn i atal Lloegr, cyn dod yn agos at sgorio cais cynta'r gêm ym mhen arall y maes.

Aethon nhw ar y blaen gyda gôl gosb gan Keira Bevan, ond i Loegr y daeth y cais cyntaf, gyda Lucy Packer, a gafodd ei magu ym Mrynaman yn croesi.

Daeth ail gais i Loegr wedi 36 munud wrth i Tatyana Heard fanteisio ar gic gelfydd gan Holly Aitchison i sgorio.

Ar drothwy hanner amser sgoriodd Abby Dow drydydd cais i'r ymwelwyr gyda rhediad gwych trwy amddiffyn Cymru i roi mantais o 3-19 iddynt ar yr egwyl

Llwyddodd Lloegr i selio'r pwynt bonws bum munud i mewn i'r ail hanner gyda chais gan Aitchison, cyn i Jess Breach ymestyn y fantais ymhellach gyda phumed cais.

Daeth cais arall yn fuan wedi hynny i'r eilydd Ellie Kildunne, cyn i Kate Williams weld cerdyn melyn i Gymru wedi i'w hysgwydd wneud cyswllt â phen May Campbell.

Sgoriodd Lloegr eu seithfed cais yn fuan wedi hynny trwy Maud Muir, cyn i gais Hannah Botterman eu cymryd tu hwnt i 50 pwynt gyda 16 munud eto i chwarae.

Cafodd May Campbell a'r capten Marlie Packer gardiau melyn o fewn eiliadau i'w gilydd i Loegr, gan olygu mai 13 o chwaraewyr oedd ganddyn nhw am y mwyafrif o'r 12 munud oedd yn weddill.

Ond Lloegr oedd yn pwyso o hyd, gyda Sarah Beckett yn croesi am nawfed cais i selio buddugoliaeth gyfforddus o 3-59.

Roedd Cymru wedi ennill eu dwy gêm gyntaf yn y bencampwriaeth eleni, yn erbyn Iwerddon a'r Alban.