´óÏó´«Ã½

Mae'r Urdd wedi dweud bod dros 8,000 o bobl bellach wedi manteisio ar eu cynnig o docynnau am ddim i faes yr eisteddfod ar gyfer teuluoedd incwm isel.

Dywedodd cyfarwyddwr yr ŵyl ei fod yn allweddol fod y mudiad yn llwyddo i ddenu'r bobl hynny i'r maes, a'u bod yn "hapus iawn" gyda gwerthiant cyffredinol y tocynnau hefyd.

Ond mae rhai eisteddfotwyr wedi codi cwestiynau am y pris, gydag oedolion yn talu £20 y dydd am fynediad ac hyd yn oed y plant sy'n cystadlu yn gorfod talu £8.

Mae hynny'n wahanol i'r drefn yn Eisteddfod yr Urdd llynedd yn Ninbych, pan gynigiwyd mynediad am ddim er mwyn annog ymwelwyr yn ôl am y tro cyntaf ers Covid.

Dywedodd Emma Driscoll ei bod wedi talu cyfanswm o tua £30 i ddod i'r maes ddydd Llun, gan fod ei phlentyn hi'n cystadlu.

"Mae e'n tipyn o arian," meddai.

"Mae'r ferch hynaf wedi tynnu mas [o gystadlu nes 'mlaen yn yr wythnos] neu fel arall bydde fe 'di bod dwbl. Dylsen nhw 'di 'neud tocyn wythnosol."

Fel Emma, roedd Gwenno Lois wedi dod â brechdanau i fwydo'i theulu er mwyn arbed ar gostau prynu bwyd.

"Fatha rhywun sy'n gweithio llawn amser, ac isio cefnogi rhywbeth Cymraeg fel hyn, dwi'n meddwl bod o 'chydig ar yr ochr ddrud."

Oherwydd y pris, meddai, dydy ei theulu ddim yn dod i'r eisteddfod am gymaint o ddyddiau ag y bydden nhw wedi hoffi.

"Os 'sa fo'n rhatach 'sa ni 'di dod am dri, bedwar diwrnod, achos mae 'na ddigon i blant 'neud yma,"esboniodd.

"Mae jyst yn bechod bod y pris mor ddrud, bod ni ddim yn gallu mwynhau'r maes am fwy nag un diwrnod."

Cytuno mae Rebecca Shepherd, a wariodd £50 am docyn teulu i ddau oedolyn a dau blentyn, ac sy'n gorfod gwneud hynny eto yn nes ymlaen yn yr wythnos.

"Roedd e am ddim llynedd, felly mae £50 ddwywaith yn ddrud," meddai.

"Falle gallen nhw wedi 'neud e fel bod plentyn sy'n perfformio ac un rhiant yn cael mynd i mewn am ddim, ac unrhyw un ychwanegol yn gorfod talu, achos fi'n deall bod angen refeniw er mwyn iddo fod cystal ag yw e."

Ond i Rhian Jones, roedd yr £20 a dalodd hi'n ddigon rhesymol.

"Mae digonedd i'r plant 'ma i wneud," meddai.

Cytuno oedd Elina Thomas, gan ddweud bod "cymaint i weld" ar y maes.

"Mae rhaid i ni dalu, neu bydd Eisteddfod yr Urdd ddim yn mynd," meddai.

Yr unig beth oedd yn gresynu Paul Jones oedd na chyrhaeddodd y maes yn ddigon cynnar i wneud y mwyaf o bris ei docyn.

"Dylen i 'di codi bach yn gynt i ddod - dim ond hanner diwrnod 'wi'n cael nawr!" meddai.

"Fel mae pethe nawr, maen nhw'n eitha' tynn ar bawb. Ond mae rhai wedi gallu dod am ddim, felly maen nhw'n trio'u gorau."

Yn ôl Dr Llinos Jones, pennaeth Ysgol Gyfun Gymraeg Bro Myrddin, bu'n rhaid i'r ysgol gynnal cyngerdd codi arian er mwyn gallu fforddio'r tocynnau ar gyfer eu disgyblion.

"Yn sicr mae'n faich ariannol mawr os ni'n edrych ar £8 i bob cystadleuydd," meddai.

"Ni fel ysgolion wedi talu am ein cystadleuwyr ni, oherwydd bod ni'n teimlo bod e'n lleihau'r baich ariannol ar deuluoedd."

Un o'r trigolion lleol a fanteisiodd ar y cynnig o docynnau am ddim oedd Hayley Linda-Price, sy'n amau a fyddai pobl fel hi wedi dod i'r maes fel arall.

"Gan fod e'n Llanymddyfri bydden i wedi trio dod am un diwrnod, ond bydden ni heb ddod am yr wythnos gyfan," meddai.

"Y bobl eraill nes i archebu tocynnau ar eu cyfer, bydden nhw heb ddod os nad oedd e am ddim.

"Dwi'n meddwl bod 'na bobl yn Llanymddyfri oedd yn meddwl bod yr eisteddfod dim ond i rieni plant sy'n cystadlu, a phobl sy'n siarad Cymraeg.

"Felly i bobl ddod i brofi'r peth a gweld fod e'n ŵyl i bawb fwynhau, mae'n hwyl i bawb."

Dywedodd Sian Eirian, Cyfarwyddwr Eisteddfod yr Urdd a'r Celfyddydau, ei bod hi'n awyddus i weld trefniant y tocynnau am ddim yn parhau i'r dyfodol, yn dilyn y galw amdanynt eleni.

"Yn sicr mi fyddan ni'n trafod gyda Llywodraeth Cymru a Phlaid Cymru i'r dyfodol," meddai.

"Mae'n hollbwysig ac mae wedi cael ei werthfawrogi'n fawr iawn gan y teuluoedd hynny. 'Dan ni wirioneddol yn meddwl bod o'n bwysig fel mudiad."

Wrth ymateb i feirniadaeth gan rai am y pris mynediad, dywedodd nad oedd prisiau wedi cynyddu ers 2018.

"Mae hynny er bod prisiau isadeiledd... wedi mynd fyny yn eithriadol, yn bell tu hwnt i chwyddiant," meddai.

"Felly mae'n falans i drio cadw pawb yn hapus."