´óÏó´«Ã½

Mae'r Seintiau Newydd wedi cael eu trechu'n gyfforddus yng nghymal cyntaf eu rownd ragbrofol gyntaf yng Nghynghrair y Pencampwyr.

Ar noson anodd yn Sweden, fe aeth pencampwyr Uwch Gynghrair Cymru ar ei hôl hi'n gynnar yn erbyn BK Häcken a threulio gweddill yr ornest yn ceisio gwrthsefyll pwysau'r tîm cartref.

Häcken oedd gryfaf o'r dechrau ac fe lwyddodd Ibrahim Sadiq i wasgu foli i mewn i'r postyn agosaf o ongl dynn ar ôl saith munud.

Roedd y Seintiau wedyn ddwy ar ei hôl hi o fewn llai na chwarter awr, wrth i groesiad ganfod Mikkel Rygaard mewn lle yn y cwrt cosbi i droi'r bêl i gefn y rhwyd.

Rhoddwyd rhywfaint o obaith i'r tîm o Groesoswallt wedi 32 munud, wrth i Declan McManus sgorio gyda'i ben o rediad a chroesiad Jordan Williams.

Ond bron yn syth cafodd Häcken eu mantais o ddwy gôl yn ôl, wrth i gic rydd Even Hovland fynd yr holl ffordd drwy'r chwaraewyr yn y cwrt cosbi a sleifio i mewn ar y postyn pellaf.

Parhau wnaeth y pwysau yn yr ail hanner gydag ond amddiffyn cadarn, ychydig o lwc, ac arbediadau campus gan Connor Roberts yn achub y Seintiau Newydd rhag ildio rhagor.

Bydd y ddau dîm yn wynebu ei gilydd yn yr ail gymal yng Nghroesoswallt nos Fawrth 18 Gorffennaf, gyda'r enillydd yn mynd drwyddo i ail rownd ragbrofol Cynghrair y Pencampwyr.

Bydd y tîm sy'n colli, ar y llaw arall, yn disgyn i rowndiau rhagbrofol Cyngres Europa, sef y gystadleuaeth drydedd haen.