´óÏó´«Ã½

Mae rhai o drigolion pentref yng Ngwynedd yn pryderu y bydd newidiadau i wasanaethau bws yn cael "effaith andwyol iawn" ar fywydau pobl yr ardal.

Ers Tachwedd y llynedd dydi gwasanaeth bws y T2 ddim yn ymweld â Garndolbenmaen.

Er y bydd gwasanaeth T22 yn ymweld yn ei le o Chwefror 2024 ymlaen, bydd hynny dal ddim mor aml â'r gwasanaethau oedd y bodoli gynt.

Yn ôl Trafnidiaeth Cymru mae'r amserlen newydd yn cynnig gwasanaethau amlach ar hyd rhannau cyffredin y llwybr.

Dywedodd Cyngor Gwynedd y bydd y gwasanaeth newydd yn "darparu bysiau trydan o'r radd flaenaf".

Bellach mae deiseb wedi ei chreu yn lleol yn galw ar Lywodraeth Cymru i wyrdroi'r penderfyniad.

Roedd gwasanaeth bws T2 yn ymweld â Garndolbenmaen 18 gwaith y dydd, a phum gwaith bob dydd Sul.

Ond gyda'r newidiadau bydd y T22 yn teithio drwy'r pentref 12 gwaith y dydd o ddydd Llun i ddydd Sadwrn - gyda chwe bws i gyfeiriad Caernarfon, a chwe bws i gyfeiriad Porthmadog a Blaenau Ffestiniog.

Yn ôl Cyngor Gwynedd, ni fydd gwasanaeth bws drwy Garndolbenmaen ar ddyddiau Sul.

Mae Megan Lloyd Williams yn Is-gadeirydd Cyngor Cymuned Dolbenmaen ac yn byw yn lleol. Dywedodd ei bod yn credu i'r newid ddigwydd "heb ymgynghoriad â'r pentref o gwbl".

"Mae 'na amddifadedd yn digwydd fan hyn o achos y newidiadau yma," meddai.

"Mae'n cael effaith andwyol iawn ar fywydau pobl."

Wrth son am y defnydd o'r gwasanaeth yn yr ardal, ychwanegodd: "Does dim siop yma na thafarn.

"Mae pobl angen mynd i apwyntiadau meddygol, mae'n rhaid mynd lawr am Port neu Gricieth"

Un arall sy'n byw yn yr ardal ydy Bryn Jones, sydd hefyd yn anghytuno gyda'r penderfyniad i newid y gwasanaeth.

"Mae 'na lot o bobl sydd heb geir, ac mae nhw angen mynd i'r ysgol, i'r siop... mae'n annheg, dydi o ddim yn iawn," meddai.

"Mi oeddwn i'n defnyddio'r bws yn reit aml.

"Un rheswm oedd oherwydd eu bod wedi rhoi bus pass i mi, ond be' mae hwnnw'n da i mi os nad oes na fws."

Wrth ymateb i wasanaeth newydd y T22, dywedodd nad oedd yn ddigon da "o bell ffordd".

"Mae'n rhaid i chi gael bws ar bob amser o'r dydd - bore, prynhawn a nos, yn mynd a dod bob ffordd."

Yn ôl yr Aelod o'r Senedd dros yr ardal, Mabon ap Gwynfor, mae'r newid "wedi achosi pryder mawr i bobl leol".

"Mae gan Garndolbenmaen boblogaeth hŷn, llawer ohonyn nhw ddim yn gyrru a felly eu hunig ffordd o deithio y tu allan i'r pentref yw ar fws." 

"Galwaf ar Lywodraeth Cymru i ddod yn ôl at y bwrdd gydag amserlen ddiwygiedig sy'n mynd i'r afael â phryderon y gymuned leol, adfer gwasanaeth y T2 i Garndolbenmaen a rhoi anghenion defnyddwyr trafnidiaeth cyn unrhyw benderfyniad masnachol."

Mewn ymateb dywedodd Trafnidiaeth Cymru, a gafodd ei sefydlu gan Lywodraeth Cymru: "Yn dilyn newidiadau diweddar i lwybr T2 TrawsCymru, bydd pentref Garndolbenmaen yn cael ei wasanaethu gan y gwasanaeth newydd y T22, sy'n dechrau ar 12 Chwefror ac yn defnyddio bysiau trydan o'r radd flaenaf.

"Mae'r amserlen newydd yn cynnig gwasanaethau yn amlach ar hyd rhannau cyffredin y llwybr. Bydd gwasanaeth newydd 1S yn gwasanaethu Garndolbenmaen dros dro nes y daw'r T22 i wasanaeth - gyda phum taith y dydd i Gaernarfon."

Cafodd Llywodraeth Cymru gais i ymateb ar wahân, ond doedden nhw ddim am ychwanegu at ymateb Trafnidiaeth Cymru.

Dywedodd llefarydd ar ran Cyngor Gwynedd: "Mae Cyngor Gwynedd wedi bod yn gweithio gyda Trafnidiaeth Cymru i gyflwyno'r gwasanaeth bws T22 newydd rhwng Blaenau Ffestiniog, Porthmadog a Chaernarfon.

"Bydd y gwasanaeth eco-gyfeillgar hwn yn darparu bysiau trydan o'r radd flaenaf fydd yn cynnig cyfleoedd ar gyfer teithiau lleol a hirach gyda cysylltiadau hwylus i wasanaethau eraill, gan gynnwys y T2.

"Bydd y T22 yn gwasanaethu pentref Garndolbenmaen pob dwy awr o ddydd Llun i ddydd Sadwrn."