´óÏó´«Ã½

Mae Radio Cymru 2 yn ymestyn ei oriau darlledu er mwyn ehangu a chyrraedd cynulleidfaoedd newydd. O ddydd Llun, 4 Mawrth, fe fydd y gwasanaeth yn darlledu dros 60 awr yr wythnos o ddeunydd gwreiddiol - cynnydd sylweddol o'r 25 awr cyn hynny.

Un o'r cyflwynwyr sydd ynghlwm â Radio Cymru 2 yw Lisa Gwilym ac felly hi sydd yn Ateb y Galw'r wythnos yma.

Taid Cwm yn rhoi oen llywath i fi adeg wyna, a finne'n cael gofalu am yr oen bob tro o'n i'n mynd i fferm Nain a Taid. Doedd yr oen ddim yno un wythnos, mi oedd o ar fy mhlat yn boddi mewn grefi a mint sauce. A byth ers hynny, dwi ddim yn bwyta cig oen!

Maes carafannau y Wern yn Nefyn. Mae gan y teulu garafán yno a'r olygfa yn un eithriadol o draeth Nefyn a Porthdinllaen. Nefoedd ar wyneb y ddaear a dwi wrth fy modd yno. Lle i enaid gael llonydd (a llymed)!

Noson fy mhriodas - parti gwych yng nghwmni ffrindiau a teulu, yn dathlu tan yr oriau man.

Siaradus, trefnus, hapus.

Dwi 'di priodi dyn doniol a direidus sy'n neud i fi chwerthin yn ddyddiol. Diolch Llyr!

2003 - roedd criw cynhyrchu Uned 5 'di gosod sialensau i'r cyflwynwyr a'r her i fi oedd cymryd rhan yn y John Cooper Challenge, sef rasio mini coch ar draciau ledled Prydain. Tra'n ymarfer ar drac rasio Donington cyn diwrnod fy ras gynta', ro'n i'n cael gymaint o hwyl ar y gyrru nes i ddim cadw golwg ar faint o betrol oedd yn y tanc, a mi ddoth y car i stop a gwrthod symud.

Roedd rhaid i'r criw diogelwch ddod i achub y mini a fi a'n cludo nol i'r garej yn saff, a finne efo gymaint o gywilydd, nes i'm deud wrth neb, jyst smalio bod rhywbeth yn bod efo'r car… Anfaddeuol!

Gwylio'r ffilm Paddington 2 efo'r mab. Er bod ni 'di gwylio'r ffilm droeon fel teulu, dwi'n crïo bob tro. Ac ydw, dwi'n un sy'n teimlo i'r byw ac yn crïo yn aml tra'n gwylio ffilmiau a rhaglenni teledu.

Dwi'n hoff iawn o dacluso ac isio byw mewn tŷ twt, sydd ddim yn hawdd pan ti'n rhannu dy gartref efo'r gŵr a'r mab. Dwi'n gyrru'r gŵr yn bonkers, ac yn cael fy nghyhuddo o gadw pethe tra mae o dal i'w defnyddio...

Ffilmiau'r 80au yn agos iawn at fy nghalon - ET, Star Wars, Gremlins - nostalgia!

Adolf Hitler. Wedi darllen lot o lyfrau yn y blynyddoedd diwethaf am erchyllterau Auschwitz, ac fel un sydd efo gradd mewn seicoleg, oes modd deall beth yn union oedd yn mynd trwy ben yr anghenfil?

Ges i fy mwrw i'r llawr gan fws double-decker ar Stryd Westgate yng Nghaerdydd. Dwi dal yma i ddeud y stori!

Gafael yn dynn yn y bobl hynny sydd wedi siapio fy mywyd, a diolch iddyn nhw am gyfoethogi fy mywyd.

Llun ohona i yn blentyn bach hapus efo Mam a Dad. Bu farw fy nhad 29 mlynedd yn ôl a dwi'n ei golli yn fawr iawn hyd heddiw. Gwilym oedd ei enw, dyn da a doeth, a dwi mor ddiolchgar iddo am roi'r dechrau gorau i fi mewn bywyd. Dwi hefyd yn falch fy mod wedi cael y cyfle i newid fy enw i Lisa Gwilym pan nes i ddechrau cyflwyno.

Neil Armstrong, neu unrhyw un sydd wedi troedio'r lleuad. Dyna oedd fy mreuddwyd pan yn hogan fach, a dwi'n dal i obeithio cael mynd rhyw ddiwrnod.

Hefyd o ddiddordeb: