´óÏó´«Ã½

Mae'r awdur a'r hanesydd o Gaernarfon, Emrys Llewelyn Jones, wedi marw yn 71 oed.

Fe sefydlodd gwmni Ty'd am Dro Co yn 2009, oedd yn cynnal teithiau cerdded o amgylch atyniadau Caernarfon.

Ysgrifennodd lyfrau am hanes y dref hefyd yn Gymraeg - Stagio Dre a Da 'Di Dre - a'r Saesneg - A Covey's Tale.

Cafodd ei gyfweld ar raglen Beti a'i Phobol yn 2016, ble y cafodd ei ddisgrifio gan Beti George fel "eicon o Gofi".

Roedd yn briod gyda'r actores a'r awdures Mari Gwilym a ddywedodd brynhawn Iau ei bod "methu coelio ei bod i wedi'i golli fo".

Cafodd ei eni a'i fagu yn ardal Maesincla yng Nghaernarfon, ac roedd yn cael ei adnabod fel "Jo Bach" gan rai o'i ffrindiau - enw a oedd yn gyfuniad o enw ei dad, a'r ffaith ei fod yn fyr o ran taldra.

Yn gefnogwr ac yn chwaraewr rygbi brwd, bu'n teithio'r byd fel aelod o dîm chwaraewyr hŷn Y Gogs (Geriatrics O Gymru).

Yn siarad gyda'r Post Prynhawn ddydd Iau dywedodd Mari Gwilym y byddai ei gŵr eisiau cael ei gofio fel "storïwr llafar".

"Roedd o'n dipyn o dywysydd tref, a hanesydd lleol, a fysa'n mwynhau cael ei gofio felly," meddai.

"Mi oedd o hefyd yn argraffydd - ac roedd o'n dod o linach o argraffwyr.

"Oedd o'n meddwl y byd o Gaernarfon, ac yn dadlau efo pobl Dinbych, yn dweud mai Caernarfon oedd 'prifddinas yr inc'!

"Roedd o hefyd yn meddwl y byd o Glwb Mynydda Cymru - roedd o wrth ei fodd yn cerdded mynyddoedd Cymru."

Ychwanegodd: "Dwi'm yn gallu coelio 'mod i wedi'i golli fo - mi fydd hi'n ddistaw yma hebddo fo.

"Dwi 'di cael 40 o flynyddoedd gwych efo fo, a dwi'n trysori be ges i."