´óÏó´«Ã½

Cafod merched Cymru gweir o 46-10 gan Loegr ym Mhencampwriaeth y Chwe Gwlad ym Mryste ddydd Sadwrn.

Er i Gymru ddechrau'n dda a mynd ar y blaen gyda gôl gosb gan Lleucu George, llwyddodd y tîm cartref i daro nôl gyda cheisiau gan Maud Muir a Zoe Aldcroft o fewn y chwarter awr cyntaf.

Fe wnaeth dwy o'r rheng-flaen - Hannah Botterman a Lark Atkin-Davies - groesi eto cyn hanner amser i selio pwynt bonws cynnar i Loegr.

24-3 oedd y sgôr ar yr hanner, ond roedd hynny'n garedig iawn gyda Lloegr, gyda Chymru wedi pwyso am gyfnodau o'r hanner cyntaf ond heb allu croesi'r gwyngalch.

Fe ddechreuodd Lloegr yr ail hanner yn yr un modd, wrth i Ellie Kildunne ac Abby Dow groesi am geisiau sydyn.

Llwyddodd Cymru i sgorio eu hunig gais o'r gêm, a hynny trwy'r eilydd Keira Bevan, cyn i'r tîm cartref daro nôl yn syth gyda cheisiau gan Rosie Galligan ac ail i Kildunne.

Er y canlyniad, mae'n arwydd fod Cymru'n gwella yn erbyn Lloegr, gyda'r garfan wedi cael eu trechu o fwy o lawer o bwyntiau dros y blynyddoedd diwethaf.

Roedd Cymru eisoes wedi colli eu gêm gyntaf yn y bencampwriaeth eleni, a hynny o 18-20 gartref yn erbyn Yr Alban.