����ý

Bydd bad achub 'D-class' RNLI Pwllheli yn gwasanaethu unwaith eto am gyfnodau cyfyngedig o ddydd Mercher ymlaen.

Fe gaeodd yr orsaf ym mis Chwefror yn dilyn “methiant difrifol” yn y berthynas rhwng aelodau’r criw yno.

Dywedodd yr RNLI nad oedd modd cynnal y gwasanaeth ym Mhwllheli oherwydd "anghytgord parhaus".

Mae'r criw bellach wedi bod yn ailhyfforddi gydag ymarferion ac asesiadau rheolaidd yn cael eu cynnal i sicrhau bod gwirfoddolwyr ar eu hanterth yn eu sgiliau.

Mae hyfforddiant ac asesiadau yn parhau er mwyn gobeithio dychwelyd i wasanaeth llawn yn fuan.

Mae rheolwyr yr RNLI wedi canmol y criw am eu hymroddiad, eu penderfyniad a'u gwytnwch i ail sefydlu'r orsaf, ac yn hyderus y bydd y 'D-class' yn gwbl weithredol yn yr wythnosau nesaf.

Dywedodd Caroline Jones, un o'r gwirfoddolwyr ar y lan yn RNLI Pwllheli: “Mae’n deimlad hollol wych gallu troi’r pagers yn ôl ymlaen a dychwelyd at yr hyn rydym wedi’i hyfforddi i’w wneud.

“Dros yr wythnosau diwethaf, mae’r criw wedi rhoi llawer iawn o amser ac ymroddiad i sicrhau ein bod ni’n barod i fynd yn ôl i achub bywydau.

“Rydyn ni'n gwasanaethu am gyfnodau cyfyngedig i ddechrau - sy’n newyddion gwych, gan ein bod ni gam yn nes at ddychwelyd i wasanaethu yn llawn.”

Dywedodd Chris Gaskin, rheolwr achub bywydau yr ardal: “Mae ymroddiad ac ymrwymiad y criw ym Mhwllheli i’w ganmol.

“Fe ategodd dwy ran o dair o’r criw eu hymrwymiad i symud ymlaen gyda’r orsaf ac rydym hefyd wedi gweld ymgyrch recriwtio hynod lwyddiannus yn y gymuned.

“Mae yna ambell gam arall i'w cymryd, ond dyma’r cam cyntaf mewn gwirionedd i ddychwelyd y 'D-class' i wasanaeth llawn, sy’n lle cyffrous i fod.”