����ý

Bydd dinas Bangor yn gosod ei stamp yn llythrennol y Nadolig yma gan y bydd darlun o'r gadeirlan i'w weld ar stampiau dosbarth cyntaf y Post Brenhinol.

Judy Hoel yw'r artist sy'n gyfrifol am y llun, ac yn ogystal â Bangor mae pedair cadeirlan arall yn rhan o'r gyfres - Caeredin, Armagh, Lerpwl a Westminster.

Dywedodd Esgob Enlli y Gwir Barchedig David Morris: “Mae'n ddyluniad hardd iawn ac edrychaf ymlaen at dderbyn fy ngherdyn Nadolig cyntaf gyda stamp sy'n arddangos Cadeirlan Bangor.

“Mae’n arbennig o arwyddocaol i ni wrth i ni baratoi i ddathlu 1,500 o flynyddoedd ers i Sant Deiniol sefydlu cymuned ym Mangor.

"Gobeithiwn y bydd y stamp yn annog pobl i ymweld â’r Gadeirlan yn ystod ein dathliadau Nadolig.”

Ar raglen Dros Frecwast fore Mawrth ychwanegodd Archddiacon Meirionnydd, y Parchedig Robert Townsend bod y "cyfan yn anhygoel ac yn fraint" ar drothwy y pen-blwydd 1,500.

"Mae'n mynd i gynyddu diddordeb yn y gadeirlan a rhoi proffil arall i ni ac mae hynny i'w groesawu.

"Dwi'n gobeithio y bydd pobl yn gweld y stampiau ac yn sylweddoli bod gennym ni gadeirlan sy'n eithaf hynafol yma ym Mangor a bod e'n werth taro mewn.

"Mae'n un o'r safleoedd Cristogol hynaf ym Mhrydain. Blwyddyn nesaf mae'n flwyddyn dathlu y 1,500 - nid yn unig i'r gadeirlan ond i ddinas Bangor. Mae hyn yn ffordd wych iawn i gychwyn."

Ychwanegodd ei fod yn disgwyl cyfnod prysur ar drothwy'r Nadolig wrth i nifer gynnal gwasanaethau carolau yn y gadeirlan.

"Mae'n anodd weithiau erdrych ar ôl yr adeiladau ond mae'n fraint i'w cael nhw - mae'r adeilad ei hun yn dystiolaeth i Gristnogaeth ac i'r gwerthoedd 'dan ni'n cysylltu efo'n ffydd ni."

Mae'r Post Brenhinol yn argymell postio'n ail ddosbarth erbyn brynhawn Mercher, 18 Rhagfyr ac os am bostio dosbarth cyntaf mae'n rhaid gwneud hynny erbyn 20 Rhagfyr.