´óÏó´«Ã½

Mae tywydd garw a llifogydd wedi effeithio rhannau o Gymru ddydd Mercher.

Roedd rhybudd y Swyddfa Dywydd am law trwm mewn grym tan 18:00 nos Fercher, gyda Cyfoeth Naturiol Cymru wedi rhybuddio y gallai sawl afon orlifo.

Roedd adroddiadau fod mwy na 500 o gartrefi wedi colli cysylltiad trydan fore Mercher.

Dywedodd Gwasanaeth Tân ac Achub Canolbarth a Gorllewin Cymru eu bod wedi delio gyda 12 achos o lifogydd drwy gydol y dydd.

Dywedodd David Waghorn o Glwb Rygbi Vardre yng Nghlydach bod dŵr wedi llifo i gampfa ac ystafelloedd newid y clwb.

"Mae'r caeau chwarae wedi eu gorchuddio'n llwyr gyda dyfnder sylweddol o ddŵr o Afon Tawe, a bydd rhaid aros i'r dŵr gilio er mwyn asesu'r difrod a phenderfynu a fydd gemau'r penwythnos yn cael eu heffeithio."

Cafodd hyrddiadau o 75 milltir yr awr eu cofnodi yng Nghapel Curig yn Eryri yn oriau mân fore Mercher.

Roedd hyrddiadau o tua 60 milltir yr awr ym Mhen-bre ac yn Aberdaron, tra bod gwyntoedd cryfion hefyd wedi eu cofnodi yn ardal y Mwmbwls.

Roedd hyd at 50-100mm o law yn debygol o ddisgyn ledled Cymru, gyda'r posibilrwydd o 150-200mm mewn rhai llefydd, medd y Swyddfa Dywydd.

Roedd wedi cyhoeddi sawl rhybudd am lifogydd yn ystod y dydd, a degau o rybuddion i fod yn barod.

Cafodd nifer o ffyrdd hefyd eu heffeithio gan y tywydd garw.

Roedd oedi ar yr A465 yn Hirwaun, Rhondda Cynon Taf, oherwydd llifogydd.

Rhwng Bethesda a Chapel Curig, roedd yr A5 wedi ei rhwystro'n rhannol.

Roedd llifogydd wedi effeithio'r traffig ar yr A4212 rhwng y Bala a Fron-goch, tra bod y B5106 yn Llanrwst ynghau am gyfnod rhwng Castell Gwydir a'r A470.

Roedd yr A4067 tua’r de, rhwng Castle Bingo a chylchdro Treforys, wedi ei chau yn sgil llifogydd.

Mae coeden wedi syrthio ar Ffordd Holt ger Wrecsam.