´óÏó´«Ã½

Mae'r cyflwynydd Mari Grug wedi cyhoeddi bod y canser wedi dychwelyd.

Ym mis Ebrill 2023 cafodd ddiagnosis o ganser y fron, wedi iddi ddarganfod lwmp yn ei bron chwith, cyn cael triniaeth ar gyfer canser metastatic wedi i'r canser ledu i'r nodau lymff a'r afu.

Flwyddyn wedi'r diagnosis, datgelodd y fam 40 oed o Fynachlogddu, bod ei sganiau diwethaf ar yr afu yn glir o ganser.

Ond mewn neges fideo ar y cyfryngau cymdeithasol ddydd Mawrth, dywedodd cyflwynydd Prynhawn Da a Heno ei bod ar fin derbyn triniaeth eto.

"Yn anffodus mae'r canser wedi dychwelyd a dwi ar fin dechrau ar gyfnod o gemotherapi," meddai.

Mewn neges at wylwyr Prynhawn Da, dywedodd na fydda'i "gyda chi gymaint dros y misoedd nesa".

Ond dywedodd ei bod yn gobeithio parhau i weithio ychydig gan ei fod wedi "helpu fi gyment tro diwetha'".

"Licen i ddiolch i chi gyd am eich cefnogaeth dros y flwyddyn a hanner diwetha'," meddai.

"Dwi'n gwybod y byddech chi gyda fi 'to bob cam o'r ffordd. Felly, amdani."

Yn dilyn ei diagnosis, fe gyflwynodd Mari Grug bodlediad, sy'n trafod canser - 1 mewn 2.

Fe siaradodd yn agored hefyd am farwolaeth, gan ddweud nad yw hi ofn marw, ond ei bod yn poeni am effaith posib hynny ar ei phlant.