´óÏó´«Ã½

Mae Heddlu'r Met wedi dod â'u hymchwiliad i'r sgandal betio ar yr etholiad cyffredinol i ben.

Mae ´óÏó´«Ã½ Cymru'n deall bod cyn-AS Sir Drefaldwyn Craig Williams yn un o'r rheiny oedd yn destun ymchwiliad.

Daeth hynny wedi i'r cyn-gynorthwyydd i Rishi Sunak gyfaddef iddo wneud "camsyniad difrifol" wrth roi bet ar ddyddiad yr etholiad cyffredinol.

Dywedodd Heddlu'r Met ddydd Gwener fod y troseddau oedd dan ymchwiliad ddim yn cyrraedd y "lefel uchel" sydd ei angen er mwyn profi camymddwyn mewn swydd gyhoeddus.

Ond mae'r Comisiwn Hapchwarae yn dal i ymchwilio i unhryw achosion posib o dorri'r Ddeddf Hapchwarae.

Lansiwyd ymchwiliad i wleidyddion a swyddogion heddlu yn gynharach eleni yn dilyn honiadau eu bod wedi defnyddio gwybodaeth fewnol er mwyn gosod betiau ar ddyddiad yr etholiad cyffredinol.

Fe wnaeth y Comisiwn Hapchwarae ddechrau ymchwilio i'r achosion hynny, er mwyn ystyried a oedden nhw wedi mynd yn groes i'r Ddeddf Hapchwarae trwy dwyllo.

Ond fe wnaeth Heddlu'r Met hefyd lansio ymchwiliad i "nifer fechan o achosion" ble roedd honiadau y gallai troseddau eraill - fel camymddwyn mewn swydd gyhoeddus - fod wedi digwydd.

Dywedodd y llu ddydd Gwener nad oedd y dystiolaeth a gasglwyd ganddynt yn ddigon i gyrraedd y "lefel uchel" sydd ei angen er mwyn profi trosedd o'r fath.

Ond mae ymchwiliad y Comisiwn Hapchwarae yn parhau, er mwyn asesu a gafodd gwybodaeth gyfrinachol "ei ddefnyddio i gael mantais annheg tra'n betio ar ddyddiad yr etholiad cyffredinol".