����ý

Mae ymgeisydd y Ceidwadwyr ar gyfer sedd Pen-y-bont wedi tynnu allan o'r etholiad cyffredinol oherwydd sylwadau "hollol amhriodol" yr oedd wedi'u gwneud ar-lein.

Adroddodd y Mirror fod Sam Trask wedi cyhoeddi negeseuon rhywiol am fenywod i wefan myfitnesspal.

Ymddiheurodd Mr Trask am y sylwadau a gafodd eu gwneud nifer o flynyddoedd yn ôl meddai.

Dywedodd yr ymgeisydd Llafur ar gyfer y sedd, Chris Elmore: "Mae'r datgeliadau erchyll hyn yn codi cwestiynau difrifol am safon yr ymgeiswyr y mae'r Torïaid wedi'u gorfodi i'w dewis."

Mae’r Ceidwadwyr yn amddiffyn y sedd a enillwyd ganddynt yn yr etholiad cyffredinol yn 2019.

Roedd Mr Trask yn ymgeisydd am nad oedd AS blaenorol y blaid, Jamie Wallis, wedi sefyll eto ar gyfer yr etholaeth.

Dyw hi ddim yn glir pwy fydd yn sefyll dros y blaid yn y sedd, sydd wedi newid ffiniau ar gyfer yr etholiad.

Mae'r enwebiadau'n cau am 17:00 ddydd Gwener.

Dywedodd Mr Trask: “Cafodd y sylwadau hyn eu gwneud nifer o flynyddoedd yn ôl, ac rwy’n cydnabod eu bod yn hollol amhriodol.

"Am hynny rwy’n ymddiheuro ac rwyf wedi penderfynu tynnu’n ôl fel ymgeisydd.”

Dywedodd llefarydd ar ran y Ceidwadwyr Cymreig nad yw'r blaid yn "cefnogi'r sylwadau", a'u bod yn "ymchwilio i'r mater".

Llafur - Chris Elmore

Democratiaid Rhyddfrydol – Claire Waller

Plaid Cymru – Iolo Caudy

Reform UK – Caroline Jones

Y Blaid Werdd – Debra Cooper

Annibynnol - Mark Richard John