´óÏó´«Ã½

Mae Cymdeithas Bêl-droed Cymru (CBDC) wedi atal y llywydd, Steve Williams, o'i waith tra bod ymchwiliad yn cael ei gynnal.

Y gred ydy bod cyngor CBDC wedi cael gwybod am y penderfyniad wythnos ddiwethaf ac nad oes dyddiad wedi'i bennu ar gyfer gwrandawiad Williams.

Nid yw corff llywodraethu pêl-droed Cymru wedi dweud pam ei fod wedi'i atal.

Cafodd Williams ei ethol yn llywydd CBDC yn 2021 ac mae ei dymor yn y swydd yn para am flwyddyn arall.

Cyn cael ei benodi, roedd wedi gweithio i'r cyngor am fwy na dau ddegawd ac wedi bod yn is-lywydd.

Williams sy’n goruchwylio pêl-droed Cymru ar bob lefel, a bu’n rhan o broses diswyddo Rob Page fel rheolwr tîm cenedlaethol dynion Cymru fis diwethaf.

Dywedodd Williams: "Ni allaf wneud sylw. Mater i Gymdeithas Bêl-droed Cymru yw hynny."

Er nad yw CBDC wedi rhoi sylw, mae wedi cydnabod bod ymchwiliad yn cael ei gynnal.