����ý

Mae cyn-ganolwr Cymru Jamie Roberts wedi awgrymu mai buddugoliaeth Fiji dros Awstralia ddydd Sul oedd y “canlyniad gwaethaf posib” i Gymru, gyda Grŵp C yng Nghwpan Rygbi’r Byd nawr yn benagored.

Ar ôl colli i Gymru yn eu gêm agoriadol, llwyddodd y Fijiaid i drechu’r Wallabies yng Nghwpan y Byd am y tro cyntaf erioed, a hynny o 22-15.

Roedd cefnogwyr Cymru allan yn Ffrainc yn cadw llygad barcud ar bethau, gan wybod fod y canlyniad yn effeithio ar dîm Warren Gatland.

Ond roedd llawer yn cefnogi’r Ynyswyr beth bynnag, gydag un yn ei ddisgrifio fel canlyniad “anodd i Gymru, ond grêt i rygbi”.

Gyda Chymru wedi crafu buddugoliaeth pwynt bonws yn erbyn Portiwgal ddydd Sadwrn, mae llawer o’r cefnogwyr wedi aros ar arfordir de Ffrainc cyn teithio i Lyon ar gyfer yr ornest yn erbyn Awstralia ddydd Sul.

Bu rhai’n treulio’r noson ar bromenâd y ddinas mewn digwyddiad yng nghwmni Roberts, a fu’n adlewyrchu ar ganlyniadau Cymru yn y twrnamaint hyd yma.

“O ystyried y canlyniad heno [gydag Awstralia’n cael pwynt bonws], hwn oedd y canlyniad gwaethaf posib i Gymru", meddai Roberts, a enillodd 97 cap dros Gymru a’r Llewod.

“Mae’n rhaid i ni guro Awstralia. Os nad ydyn ni, dwi ddim yn meddwl bod ni’n dianc o’r grŵp.

“Achos nawr o wybod beth sydd yn y fantol, bydd Awstralia a Fiji mwy na thebyg yn ennill eu gemau eraill gyda phwynt bonws.”

Cytuno oedd rhai o’r cefnogwyr bod canlyniadau’r penwythnos hwn wedi cynyddu pwysigrwydd yr ornest i ddod yn erbyn y Wallabies.

“Ro’n i’n falch dros Fiji, ond roedden i eisiau i Awstralia ennill,” meddai Alan Francis o Gaerdydd.

“Mae wedi agor y grŵp, ac mae gan Gymru bopeth i’w wneud wythnos nesa’, ond mae’n rhaid i’r bois ei ‘neud e.”

Roedd Danial o Gaergybi’n teimlo y gallai carfan Warren Gatland gymryd hyder o’r canlyniad.

“Dwi’n meddwl bod Eddie Jones ar downward spiral efo Awstralia, felly dwi’n gweld Cymru’n curo,” meddai.

Roedd eraill yn falch o weld Fiji yn ennill, hyd yn oed os yw hynny’n gwneud tasg Cymru o ddod allan o’r grŵp yn anoddach.

“Onid yw hynny’n gwneud pethau’n fwy diddorol?” meddai Jac o Gaerffili, oedd hefyd yn y digwyddiad fel rhan o grŵp MSG Tours.

“Yn y bôn mae’n rhaid i ni gael yr agwedd ein bod ni’n mynd i guro Awstralia a gorffen ar frig y grŵp, a bod Fiji yn dod gyda ni.”

Roedd Craig, o Gatffrwd yn Sir Fynwy, hefyd yn cefnogi’r Ynyswyr er gwaethaf y goblygiadau i’w dîm ei hun.

“Mae’n anodd i Gymru, ond mae’n grêt i rygbi, achos mae’n wych bod Fiji wedi curo Awstralia,” meddai.

“Dychmygwch Fiji a Chymru yn y chwarteri, byddai’n ffantastig i rygbi.”

Byddai rhai o bosib yn ei chael hi’n anodd deall pam fyddai rhywun yn cefnogi gwrthwynebydd, er nad yw’r canlyniad yn ffafrio’ch tîm chi.

Ond i Ann Kirwan o Ferthyr Tydfil, mae’n rhan o’r awyrgylch sydd mor arbennig am ddilyn rygbi.

“Mae’n arbennig bod pobl yn dod ymlaen gyda’i gilydd a chefnogi ei gilydd,” meddai.

Cytuno mae Steve Howells o Rymni, aeth i Fiji yn 2013 fel rhan o daith y Llewod yn Seland Newydd.

“Mae pobl rygbi yr un peth unrhyw le ewch chi yn y byd, does dim drwgdeimlad. Ni’n dymuno’r gorau iddyn nhw, maen nhw’n dymuno’r gorau i ni.”

Mae’n brofiad y mae Nans Davies, o Frynteg yng Ngheredigion, wedi ei drysori ar ei thrip cyntaf i wylio Cwpan y Byd dramor.

“O’dd ‘da ni ffans Portiwgal yn eistedd ar bwys ni [yn y gêm] – o’dd e’n neis cymdeithasu a phawb yn dod ‘mlaen yn dda gyda’i gilydd, dim gwahaniaeth o ba wlad maen nhw’n dod,” meddai.

“Ni ‘di cwrdd â rhai o Fiji a Japan, mae’n hollol wahanol i beth ni ‘di ‘neud o’r blaen [yn dilyn y Chwe Gwlad].”