����ý

Mae hyd at 70 o rieni a busnesau bellach yn honni eu bod wedi colli arian i’r cyn bêl-droediwr rhyngwladol Natasha Harding.

Y gred yw y gallai’r cyfanswm sydd wedi ei golli fod bron yn £70,000.

Mae cyn-gapten Reading, sydd nawr yn defnyddio ei chyfenw priodasol Allen-Wyatt, yn wynebu nifer o honiadau gan gynnwys cymryd arian am sesiynau hyfforddi un-i-un gyda phlant, wnaeth ddim cael eu cwblhau.

Dywedodd Ms Allen-Wyatt ei bod hi wedi gorfod canslo “rhai sesiynau” oherwydd amgylchiadau y tu hwnt i’w rheolaeth, gan ymddiheuro i’r rheiny a gafodd eu heffeithio.

Ers i’r honiadau ymddangos yn gyntaf, mae rhieni a busnesau o ogledd a de Cymru, a siroedd Caerloyw a Chaerwrangon yn Lloegr, wedi dweud wrth ����ý Cymru am eu profiadau hwythau gyda Ms Allen-Wyatt, gyda’r honiadau newydd yn dod i £27,000.

Yn y cyfamser mae rhiant a sefydlodd grŵp WhatsApp ar gyfer y rheiny sydd wedi’u heffeithio yn dweud bod eu cyfanswm nhw yn tua £40,000.

Mae adroddiadau wedi eu gwneud i sawl llu heddlu yng Nghymru a Lloegr, a rhai wedi eu pasio ymlaen i Action Fraud, sy’n cydlynu cwynion twyll o bob rhanbarth.

Dywedodd Action Fraud bod o leiaf un adroddiad “yn cael ei asesu ar hyn o bryd” gan y Fenter Twyll Genedlaethol.

Mae rhai o gyn gyd-chwaraewyr Ms Allen-Wyatt hefyd wedi dweud wrth y ����ý fod rhai o’i gweithredoedd wedi “effeithio arnom ni, ein teuluoedd a’n ffrindiau”.

Cafodd un o’i chyn-glybiau, Manchester City, eu hannog i dorri cysylltiadau gyda hi fel sylwebydd, yn dilyn yr honiadau.

Mae Andy Hughes yn hyfforddwr gwirfoddol gyda thîm merched dan-12 a dan-13 Neuadd Llaneurgain yn Sir y Fflint.

Dywedodd fod Ms Allen-Wyatt wedi cynnig sesiynau un-i-un i aelodau o’i dîm ar ôl iddi ymddangos ar ei bodlediad, ‘This Girl Can Play’, a chrybwyll ei bod hi eisiau ehangu ei hacademi i’r gogledd.

Fe wnaeth 12 o chwaraewyr gytuno i 10 sesiwn hyfforddi, ar gost o £280 y chwaraewr.

Ond dim ond dau floc o sesiynau gafodd eu rhoi, gyda sesiynau diweddarach yn cael eu canslo neu ohirio ar ôl i Ms Harding ddweud wrth Mr Hughes ei bod hi wedi cael dwy brofedigaeth yn y teulu.

Ni chafodd unrhyw sesiynau eraill eu trefnu, a dywedodd Mr Hughes nad oedd unrhyw ad-daliadau wedi eu rhoi.

“Ro'n i’n siomedig iawn, iawn,” meddai.

“I rywun sydd wedi chwarae’r gêm ar y lefel yna ac sy’n eicon i’r genhedlaeth nesaf o bêl-droedwyr benywaidd, roedd y sesiynau yma’n bwysig iawn.

“Sut ydych chi’n esbonio i ferch 11 oed nad yw un o’u harwyr mewn crys Cymru yn mynd i ddod i’w hyfforddi nhw wedi’r cwbl, a’i bod wedi eu gadael nhw lawr?

“Dwi mor siomedig fod rhywun y gwnaethon ni gyflwyno fel cyfle gwych wedi troi allan fel hyn.

"Mae’n bechod mawr achos roedd y sesiynau a roddodd hi’n dda.”

Fe wnaeth Daniel Rees, sy’n rhedeg cwmni Cardiff Classic Shirts, gytuno i noddi Ms Allen-Wyatt ar ôl iddi gysylltu ag ef drwy gyfryngau cymdeithasol.

Rhoddodd £500 iddi, gydag addewid y byddai ei gwmni’n cael eu hysbysebu ar grysau ymarfer a siacedi ei hacademi am ddwy flynedd.

Dywedodd Mr Rees nad oedd wedi gweld unrhyw dystiolaeth bod hyn wedi digwydd, ac nad yw wedi derbyn esboniad gan Ms Allen-Wyatt er iddo geisio cysylltu â hi.

“Doeddwn i methu ffeindio unrhyw luniau o grysau oedd i fod wedi cael eu printio - dim ond braslun gafodd ei anfon i mi,” meddai.

“Nes i erioed feddwl y gwaethaf, jyst meddwl ei bod hi’n cael rhediad o lwc wael ac y byddai pethau’n iawn.

“I weld bod y peth mor eang nawr, mae wedi dod fel sioc i’r system.”

Cafodd Mr Rees hefyd addewid o ddau grys Gymru wedi’u gwisgo mewn gemau, ond ddaeth rheiny fyth.

Fe brynodd Kate Parker, cefnogwr Cymru brwd, sesiynau hyfforddi fel anrheg Nadolig i’w nith ar ôl gweld Academi Tash Harding ar y cyfryngau cymdeithasol.

Talodd Ms Parker, sy’n rhedeg dau dafarn yn ardal Caerffili, ragor o arian hefyd am noddi drwy’r academi a chit i’w nith, gyda’r cyfanswm yn dod i £1,335.

Ond dim ond un sesiwn ymarfer a roddwyd, gydag un arall wedi ei ganslo, ac yn y diwedd fe ofynnodd Ms Parker am ad-daliad llawn.

Dim ond £350 sydd wedi ei ddychwelyd iddi, mewn tri thaliad, gydag £885 dal yn weddill.

“Roedd hi wedi addo crys Cymru i fy nith hefyd,” meddai Ms Parker. “Mae’n beth mawr pan 'dych chi’n blentyn.

“Mae’n reit swil [ei nith]. Dwi wedi bod i cwpl o’i gemau pêl-droed a dydi hi ddim yn cymryd rhan cymaint â’r lleill.

“Roedd hi’n reit drist ond fe wnaeth fy chwaer esbonio wrthi nad oedd [y sesiynau hyfforddi] yn gallu digwydd, a dyna ni.”

Fe wnaeth ����ý Cymru gysylltu gyda Natasha Allen-Wyatt am ymateb i’r honiadau diweddaraf, ond ni chafwyd ymateb.