´óÏó´«Ã½

Roedd golygfeydd godidog i'w gweld ar hyd Cymru nos Fawrth wrth i'r lleuad llawn gyfuno ag eclips lloerol rhannol.

Mae'r hyn sy'n cael ei gyfeirio at fel supermoon - sef pan mae'r lleuad yn ymddangos yn arbennig o fawr a llachar - yn digwydd pan mae'r lleuad ar ei bwynt agosaf wrth fynd o amgylch y ddaear.

Roedd diffyg rhannol ar y lleuad i'w weld yn oriau mân fore Mercher hefyd, gyda thua 4% o wyneb y lleuad wedi ei orchuddio gan gysgod y ddaear.

Gyda'r awyr yn anghyffredin o glir, roedd modd gweld y ffenomenon o bob rhan o Gymru.

Mae supermoon yn ddigwyddiad anghyffredin, a dyma'r ail o bedwar fydd yn digwydd eleni.

Dydi diffyg rhannol ar y lleuad ddim yn ddigwyddiad sydd i'w weld yn aml chwaith.

Fe fydd yr eclips lloerol rhannol nesaf ym mis Awst 2026, pan mae disgwyl y bydd 96% o wyneb y lleuad wedi ei gysgodi.