´óÏó´«Ã½

Mae cyn-arweinydd y Blaid Lafur, Neil Kinnock, yn dweud fod y niferoedd isel a bleidleisiodd yn yr etholiad cyffredinol mewn rhannau o Gymru yn "warthus".

Yng Nghymru, dim ond 56% o'r rhai oedd yn gymwys aeth ati i fwrw pleidlais, o'i gymharu â 60% ar draws y DU, a 67% yng Nghymru y tro diwethaf yn 2019.

Er iddyn nhw ennill y mwyafrif o seddi, gostyngodd cyfran pleidlais Llafur yng Nghymru o 40% i 37%.

Ar raglen frecwast Radio Wales, dywedodd yr Arglwydd Kinnock fod y blaid yn "bryderus iawn" am y mater.

"Roedd y ffaith bod cyfran y bleidlais i lawr ac mewn rhai mannau, sawl lle, roedd y nifer a bleidleisiodd yn warthus ac yn peri gofid mawr, mae'n achos pryder gwirioneddol ac mae'n rhaid mynd i'r afael â hynny," meddai'r Arglwydd Kinnock.

Dywedodd ei fod wedi siarad gydag ymgeiswyr sy'n "bryderus iawn" am y niferoedd isel sy'n pleidleisio mewn "cymaint o etholaethau".

Cymru welodd y cwymp mwyaf yn nifer y pleidleiswyr ym Mhrydain - o'i gymharu â'r Alban a holl ranbarthau Lloegr.

Dim ond Sir Efrog a Humber oedd â chanran pleidleisio is (55.7%) ac fe welodd pob etholaeth yng Nghymru ostyngiad o'i gymharu â'r etholiad blaenorol.

Mewn cyfweliad emosiynol, dywedodd yr Arglwydd Kinnock, sydd â mab, Stephen Kinnock, sy’n AS dros Aberafan a Maesteg, fod ei neiniau a’i deidiau wedi brwydro am yr hawl i bleidleisio.

"Roedd fy mam-gu bron yn 40 oed pan gafodd ei phleidlais gyntaf. Mae hynny'n ddiweddar," meddai.

"Roedd ein neiniau, ein teidiau a'n rhieni yn rhan o genedlaethau gafodd eu herlid, oedd yn gorfod sefyll dros eu hawliau."

Ychwanegodd fod Syr Keir Starmer wedi dweud wrtho ar ôl buddugoliaeth yr etholiad y bydd y blaid nawr yn "bwrw ati".

“Be chi’n weld ydi be chi’n gael. Mae ganddo synnwyr digrifwch da," meddai'r Arglwydd Kinnock.

"Mae'n caru ei wraig a'i blant, mae'n rhan o gymuned, mae'n ddyn agos-atoch-chi, naturiol, normal."