´óÏó´«Ã½

Wedi wythnos o weithgareddau i nodi Gŵyl Gyhoeddi Eisteddfod yr Urdd Maldwyn 2024, daeth penllanw'r cyfan yn Y Drenewydd ddydd Sadwrn.

Ond yn sgil tywydd gwael, ni fu'n bosib cynnal gorymdaith oedd wedi ei threfnu.

Roedd disgwyl i gannoedd o blant a phobl ifanc orymdeithio drwy'r dref, gyda phob ysgol ar hyd y sir wedi eu gwahodd i gymryd rhan.

Ond gyda rhybudd melyn am dywydd garw mewn grym i rannau dywedodd Eisteddfod yr Urdd na fyddai'n digwydd.

Er hynny, fe gafodd prynhawn o weithgareddau ei gynnal er bod angen newid y lleoliad.

Yn hytrach na'u bod yn y parc, fe gawson nhw eu cynnal dan do yn Ysgol Dafydd Llwyd.

Dywedodd y mudiad mewn neges ar-lein eu bod wedi cael "diwrnod gwych er gwaetha'r tywydd".

Daeth y diwrnod cyhoeddi wedi i dîm o wirfoddolwyr lleol fod ar daith feicio i ymweld ag ysgolion y sir i godi ymwybyddiaeth.

Yn rhan o weithgareddau’r cyhoeddi ddydd Sadwrn roedd yna berfformiadau gan ysgolion lleol wnaeth gynrychioli rhanbarth Maldwyn yn Eisteddfod yr Urdd yn Llanymddyfri fis Mai, yn ogystal â Jambori a pherfformiad hwyliog gan Aeron Pughe a Mari Lovgreen.

Roedd ‘na ddarlleniad o’r Cywydd Croeso sydd wedi ei ysgrifennu gan Arwyn 'Groe' Davies gyda chefnogaeth plant Ysgol Dafydd Llwyd ac Ysgol Pontrobert.

Ac roedd modd clywed 'Cân y Cyhoeddi' hefyd sydd wedi ei hysgrifennu gan Ann Fychan a chyn-enillydd Cân i Gymru, Rhydian Meilyr

Nos Sadwrn yng Nghanolfan Hamdden Caereinion mae ‘na noson o adloniant gan dalentau lleol, ac fe fydd yna gymanfa ganu yng Nghapel Heol China, Llanidloes brynhawn Sul.

Dydy Eisteddfod yr Urdd ddim wedi ymweld â Sir Drefaldwyn ers 1988, pan gafodd ei chynnal yn y Drenewydd.

Bydd Eisteddfod yr Urdd 2024 yn cael ei chynnal rhwng 27 Mai a 1 Mehefin y flwyddyn nesaf ym Meifod.