´óÏó´«Ã½

Mae dedfryd gyrrwr wnaeth ladd bachgen 13 oed yn Rhondda Cynon Taf ar ôl ei daro gyda char wedi cael ei chynyddu yn y Llysoedd Cyfiawnder Brenhinol.

Bu farw Kaylan Hippsley dridiau ar ôl cael ei daro gan gar a oedd yn cael ei yrru gan Harley Whiteman, 19, ar Heol Aberhonddu yn Hirwaun ar 29 Chwefror.

Cafodd Whiteman ei ddedfrydu i chwe blynedd a naw mis dan glo yn Llys y Goron Merthyr Tydfil ym mis Ebrill.

Ond cafodd y ddedfryd ei chynyddu i naw blynedd ddydd Mercher, yn dilyn apêl gan deulu Kaylan Hippsley.

Roedd Whiteman, 19, wedi meddwi pan ddigwyddodd y gwrthdrawiad.

Fe wnaeth y gyrrwr ffoi o'r safle ar ôl taro Kaylan, cyn dychwelyd ac ymddwyn yn sarhaus cyn cael ei arestio.

Wrth ei ddedfrydu fis Ebrill, dywedodd y barnwr Jeremy Jenkins fod Kaylan wedi cael ei ladd wrth i Whiteman "anwybyddu rheolau'r ffordd", a bod ei ymddygiad wedi bod yn "wrthun a dienaid".

Doedd teulu Kaylan ddim yn hapus â'r ddedfryd ac fe ofynnon nhw i swyddfa'r Twrnai Cyffredinol drefnu adolygiad ohoni yn y Llysoedd Cyfiawnder Brenhinol yn Llundain.