´óÏó´«Ã½

Mae merched Cymru wedi llwyddo i sicrhau eu lle yn ail haen cystadleuaeth y WXV ar ôl ennill o 52-20 yn erbyn Sbaen.

Mae'r canlyniad hefyd yn golygu fod Cymru wedi hawlio eu lle yng Nghwpan y Byd 2025.

Fe ddechreuodd Cymru ar dân, gydag Alex Callender yn sgorio cais yn y munudau cyntaf.

Fe wnaeth Sbaen ennill o 29-5 y tro diwethaf i'r ddwy wlad wynebu ei gilydd yn 2019, ond doedd yr ymwelwyr methu ymdopi â'r pwysau cynnar, wrth i Abbie Fleming groesi am ail gais i Gymru wedi 13 o funudau.

Ond ar ôl i Carys Cox gael ei hanfon i'r gell gosb, fe fanteisiodd Sbaen ar y ffaith fod Cymru lawr i 14 o chwaraewyr.

Ines Antolinez sgoriodd y cais cynta i'r ymwelwyr cyn i Claudia Pena groesi i'w rhoi ar y blaen.

Daeth dau gais arall ym mhum munud ola'r hanner cyntaf - Alisha Joyce-Butchers i Gymru a Claudia Perez i Sbaen - gan ei gwneud hi'n 21-20 ar yr egwyl.

Fe lwyddodd Cymru i reoli'r gêm yn well yn yr ail hanner, ac fe sgoriodd Cox i ymestyn mantais y tîm cartref wedi 47 munud.

Fe groesodd Joyce-Butchers am yr eildro, cyn i Cox sgorio ei hail gais hi i'w gwneud hi'n 40-20 gyda chwarter awr yn weddill.

Daeth dau gais arall yn y munudau olaf i goroni perfformiad ardderchog gan Gymru yn yr ail hanner - un gan Jenny Hesketh, ac un arall i Cox.

Bydd cystadleuaeth y WXV2 yn cael ei chynnal yn Ne Affrica ym mis Medi a Hydref.