����ý

Mae cyn-chwaraewr rygbi wedi dweud na fydd yn dychwelyd i'r gêm broffesiynol er mwyn gwarchod ei iechyd meddwl.

Fe gyhoeddodd Harri Morgan, 24, a oedd yn chwarae i’r Gweilch, ei fod yn cymryd seibiant o'r gamp yn 2023 ar ôl iddo geisio lladd ei hun.

Fe gollodd ei nain a'i daid o fewn cyfnod agos i’w gilydd, ac roedd pwysau chwarae’n broffesiynol wedi gwaethygu’r sefyllfa, meddai.

Dywedodd Undeb Rygbi Cymru fod y cyfnodau o fewn y gamp yn gallu bod yn heriol, a'u bod wedi ymroi i weithio ar sut mae chwaraewyr yn cael eu cefnogi yn y cyfnodau hyn.

Cafodd Morgan, a oedd arfer chwarae i Gymru dan-20 a chlwb Pen-y-bont ar Ogwr, sawl anaf yn ystod ei yrfa fer.

Dywedodd fod yr anafiadau wedi gwaethygu’r galar yr oedd yn profi.

“Ro'n i wir ddim yn teimlo fod 'na lawer o gefnogaeth o amgylch y rheiny oedd wedi eu hanafu o fewn y byd rygbi," meddai wrth raglen ����ý Wales Live.

“Ro'n i’n teimlo fel 'mod i methu dweud dim, neu fydden i’n gadael fy nghyd-chwaraewyr a'n hyfforddwyr i lawr.

"Ar ddiwedd y dydd ro'n i dal angen cytundeb."

Roedd y teimlad o fod yn unig ac ynysig wedi cynyddu ar ôl iddo golli ei nain a thaid o fewn cyfnod agos i'w gilydd.

“Fe gychwynnodd fel gor-bryder," meddai.

“Bydde fy nghalon yn cychwyn curo yn sydyn a byddwn i’n mynd yn fyr o anadl."

Dywedodd nad oedd yn gallu delio â'r sefyllfa a'i fod wedi ystyried lladd ei hun.

“Ro'n i ddim wir yn teimlo unrhyw beth, ro’n i’n teimlo’n wag.”

Ar ôl iddo siarad am ei iechyd meddwl, dywedodd ei fod wedi derbyn cefnogaeth wych gan ranbarth y Gweilch.

“Dwi methu rhoi bai ar y clwb, roedden nhw’n anhygoel,” meddai.

“Fe wnaethon nhw roi amser i fi a’r gwagle o'n i angen, a’r cyfle i ddychwelyd os o'n i’n dymuno."

Ond mae Morgan yn bendant bellach nad yw am ddychwelyd i’r byd rygbi proffesiynol.

“Dwi wedi cael y cyfle i ddychwelyd a dwi wedi gwrthod, pob tro," meddai.

"Bydde well gen i fod yn hapus na chael yr holl fanteision o fod yn chwaraewr rygbi proffesiynol."

Erbyn hyn mae’n rheoli campfa ac yn gweithio fel hyfforddwr ffitrwydd, ac yn gobeithio gweld mwy o gefnogaeth yn cael ei chyflwyno i chwaraewyr.

“Mae am greu’r lle am drafodaethau, gyda’r rheiny sydd mewn pŵer o fewn y byd rygbi yn holi 'beth allwn ni wneud i helpu?'" meddai Morgan.

“Mae’n ymwneud â’r diwylliant a deall anghenion yr unigolyn.”

Mewn datganiad, dywedodd Undeb Rygbi Cymru: “Mae wastad yn anodd clywed y problemau mae rhai unigolion o fewn rygbi wedi dioddef.

"Tra ein bod yn meddwl am y rheiny sy’n dioddef neu wedi dioddef, rydym yn hynod ddiolchgar i’r rheiny sy’n annog chwaraewyr i siarad mor ddewr am y pwnc."

Os ydych chi wedi cael eich effeithio gan gynnwys yr erthygl yma, mae cymorth a gwybodaeth ar gael ar wefan ����ý Action Line.