´óÏó´«Ã½

Bu'n rhaid i aelodau un o griwiau'r RNLI yn y gogledd adael parti Calan Gaeaf ar gyfer plant lleol yng ngorsaf y bad achub er mwyn ymateb i alwad frys.

Roedd y plant yng nghanol gêm ddawnsio disgo wrth i'r parti ddirwyn i ben yng ngorsaf bad achub Pwllheli pan ganodd ddyfeisiau'r gwirfoddolwyr i'w hysbysu bod argyfwng wedi codi.

Gwasanaeth Gwylwyr y Glannau oedd yn eu galw, am 16:46 brynhawn Sul, wedi i nam mecanyddol achosi i gwch hwylio 40 troedfedd fynd yn beryglus o agos at greigiau'r harbwr.

Bu'n rhaid gwagio'r neuadd wrth i'r achubwyr baratoi i fynd i roi cymorth, ac fe aeth rhai o'r plant, yn eu gwisgoedd ffansi, i'r traeth i wylio'r bad achub yn mynd i'r môr.

"Gyda'r gwynt yn codi a'r llanw ar fin troi, gwnaethon ni benderfynu mai'r peth mwya' diogel i'w wneud oedd tynnu'r cwch i Farina Pwllheli lle byddai timau Gwylwyr y Glannau o Gricieth ac Abersoch yn ein cwrdd," meddai Dave Williams oedd wrth y llyw.

"Cafodd aelod bad achub ei roi ar y cwch i helpu'r criw, oedd oll ag offer da ac yn gwisgo siacedi achub.

"Fe wnaethon nhw'r peth cywir trwy gysylltu â Gwylwyr y Glannau pan wnaethon nhw."

Roedd hi'n "gyffrous", medd cadeirydd codi arian RNLI Pwllheli, Alison Hayes, "i weld galwad frys yn digwydd o flaen ein llygaid".

"Hoffwn ni ddiolch i'r holl blant a'u rhieni am fod mor amyneddgar wrth i'w parti ddarfod ychydig funudau'n gynt na'r disgwyl, ond rydan ni'n meddwl bod o werth o [iddyn nhw] weld beth yw bad achub.

"Aeth llawer o'r parti i'r traeth hyd yn oed yn y glaw trwm a'r gwynt, yn eu gwisgoedd ffansi, i weld lansiad y bad achub.

"At ei gilydd roedd yn brynhawn ardderchog sy'n dangos i bawb pam mae codi arian mor bwysig o ran achub bywydau yn y môr."