´óÏó´«Ã½

Mae apêl codi arian i greu cerflun efydd i goffau un o sêr Monty Python yn ei dref enedigol yng ngogledd Cymru wedi llwyddo i gasglu bron i £100,000.

Mae ymgyrch Python on the Prom, sydd wedi denu cefnogaeth gan actorion megis Emma Thompson a Steve Coogan, yn gobeithio codi £120,000 i ddylunio a chreu cerflun o Terry Jones ar y promenâd ym Mae Colwyn.

Yn 77 oed bu farw Terry Jones o fath prin o ddementia yn 2020.

Gyda bwriad i gynnal arddangosfa yn y dref fis nesaf, mae ei deulu wedi darparu dwsinau o luniau ac eitemau nas gwelwyd o'r blaen o'i archif personol.

Fe lansiwyd yr ymgyrch mis Medi gan blant Terry Jones, Sally a Bill.

Dywedodd Sally Jones eu bod wedi cael sawl awgrym am sut y dylai'r cerflun edrych.

“Pan rydych chi’n cychwyn ymgyrch fel hon does gennych chi ddim syniad beth fydd yr ymateb ac mae wedi bod yn hynod gadarnhaol.

"Mae pobl ledled y byd ar gyfryngau cymdeithasol yn siarad am yr ymgyrch, gyda llwyth o syniadau am yr hyn y dylai'r cerflun fod."

Ychwanegodd: "Rydyn ni eisiau gwneud ychydig o ymgynghori, ond rydyn ni hefyd yn gweithio gyda'r artist Nick Elphick i edrych ar wahanol ystumiau a gweld sut y gallai'r cerflun weithio orau ar y prom sy'n edrych allan i'r môr."

Yn gweithio gyda nhw ar y cynllun mae Ymddiriedolaeth Celfyddydau Conwy.

Dywedodd cadeirydd y grŵp, Dilwyn Price, eu bod wedi "rhyfeddu" at lwyddiant yr ymgyrch hyd yma.

"'Da ni bron wedi cyrraedd £100,000, sy'n anhygoel o swm," meddai.

"Mae bob dim i'w weld yn mynd yn dda a 'da ni'n edrych ymlaen wrth gwrs at gyrraedd y nod."

Dywedodd i Terry dreulio ei bum mlynedd cyntaf yn byw yn Hen Golwyn, a'i fod yn "Gymro i'r carn".

"Roedd Terry a John Cleese yn cael sgyrsiau difyr iawn am Gymru a Lloegr," ychwanegodd Dilwyn.

"Roedd yn gefnogol tu hwnt i Theatr Colwyn... roedd ei daid yn arwain y gerddorfa yn y theatr ei hun ac roedd ei nain a'i fodryb yn canu a dawnsio ar y llwyfan."

Mae teulu Terry Jones hefyd wedi agor ei archif bersonol o luniau o bob cyfnod o’i fywyd i’w harddangos yn Oriel Colwyn fis nesaf.

Mae'r curadur Paul Sampson yn mynd drwy gannoedd o luniau ac eitemau cofiadwy i benderfynu pa rai fydd yn cael eu harddangos.

Dywedodd Sally Jones fod y teulu wedi dod ar draws llawer o ddeunydd ers etifeddu archif ei thad.

"Roedd Dad yn dda iawn am gadw popeth mewn trefn, ond rydw i'n agor ffeiliau ac mae pethau anhygoel yn popio allan.

"Felly dwi newydd ddod â chês llawn arall o Lundain i Paul ei weld."

Ychwanegodd Paul Sampson: "Roedd gan Terry angerdd am fywyd, wnes sylwi ar hynny pan wnes i gyfarfod ag o ychydig o weithiau, a gallaf weld hynny yn y lluniau hyn.

"Alla'i weld yr angerdd a'r cariad hwnnw at fywyd ac at gomedi."