´óÏó´«Ã½

Mae cwmni Tata Steel wedi cyflwyno cais cynllunio i Gyngor Castell-nedd Port Talbot ar gyfer ffwrnais drydan newydd.

Ddiwedd Medi fe ddaeth y dull traddodiadol o gynhyrchu dur i ben wrth i ffwrnais chwyth 4 gynhyrchu dur am y tro olaf.

Dywed y cwmni eu bod wedi ymgynghori'n helaeth gyda thrigolion lleol, gweithwyr Tata Steel UK ac arbenigwyr eraill cyn cyflwyno'r cais.

Fe ddaeth yr ymgynghoriad i ben ar 15 Hydref.

Bydd buddsoddi £1.25bn mewn ffwrnais drydan yn lleihau allyriadau ac yn sicrhau dyfodol cynhyrchu dur, medd y cwmni.

Mae cau’r ffwrneisi yng ngweithfeydd dur mwyaf y DU yn rhan o ailstrwythuro a fydd yn cael gwared â 2,800 o swyddi.

Bydd Cyngor Castell-nedd Port Talbot nawr yn cynnal eu hadolygiad ac ymgynghoriad eu hun ar y cynllun ac mae disgwyl penderfyniad yn gynnar yn 2025.

Mae llywodraeth y DU wedi dweud eu bod nhw'n cyfrannu £500m tuag at gost y dechnoleg newydd ac os yw'r cais cynllunio yn cael sêl bendith mae disgwyl i’r gwaith adeiladu ddechrau ym mis Awst 2025.

Dywedodd Rajesh Nair, Prif Swyddog Gweithredol Tata Steel UK: “Rydym yn falch iawn ein bod bellach wedi cyflwyno ein cais cynllunio a hoffwn ddiolch i bob un sydd wedi cysylltu â ni."

Dywedodd yr Ysgrifennydd Busnes a Masnach Jonathan Reynolds: “Mae’n wych gweld y cynlluniau hyn yn symud ymlaen yn gyflym wrth i ni ymdrechu i ddatgarboneiddio’r sector dur."