´óÏó´«Ã½

Air an t-seachdain seo, cluinnidh sinn seirbheis a chaidh a chraoladh sa Chèitean 2003 còmhla ris an Urr Dòmhnall MacAmhlaigh nach maireann, a bha mu dheireadh na mhinistear air coitheanal Eaglais na h-Alba ann am Beàrnaraigh, Leòdhais.

Anns an t-seirbheis cluinnidh sibh na sailm is an leughadh a leanas:
Salm 102: 25-27 air fonn Martyrdom agus ‘s e Alasdair Greumach a tha os cionn na seinn le taic bho choitheanal Seamanaraidh na h-Eaglaise Saoire ann an Steòrnabhagh.
Salm 27: 13-14 air fonn Torwood agus ‘s e Iain Mac a' Ghobhainn a tha os cionn na seinn le taic bho choitheanal Eaglais na h-Alba ann am Barabhas.
Salm 122: 6-7 air fonn Stornoway agus ‘s e Dòmhnall Iain MacIllFhinnein a tha os cionn na seinn le taic bho choitheanal Eaglais na h-Alba ann an Loch nam Madadh.

Leughadh Isaiah 61: rannan 1-11
Ceann-teagaisg: Isaiah 61: 1.

Rugadh Maighstir MacAmhlaigh ann am Beàrnaraigh ann an Eilean Leòdhais anns a' Ghearran 1926. Bha triùir bhalach anns an teaghlach aca; e fhèin agus a dhithis bhràithrean Niall Iain agus Seòras. Às dèidh an sgoil fhàgail rinn iad am beò-shlàint anns an sgìre aca fhèin a’ sàs ann an obair ag iasgach ghiomach agus iad gu math pailt aig an àm sin. Bha Mgr MacAmhlaigh ag iasgach gus an deach a ghairm dhan t-Seirbheis Nàiseanta. 'S ann san RAF a rinn a Sheirbhis Nàiseanta agus bha e cuideachd sa Chabhlach Rìoghail ag obair air an Donaldson Line far an robh e a’ siubhal gu Ceann a Tuath agus Ceann a Deas Ameireaga.

Fhuair e gairm chun na ministrealachd faisg air deireadh na leth-cheudan agus cheumnaich e à Colaiste an Rìgh ann an Obair Dheathain ann an 1968. Nas anmoiche air a' bhliadhna sin chaidh a phòsadh ris a' chiad choitheanal aige ann an Leumrabhagh air taobh a deas na Lochan ann an Leòdhas far an robh e na mhinistear airson fichead bliadhna. Leig e dheth a dhreuchd an uairsin agus thill e air ais gu baile àraich a Bheàrnaraigh. Bha an sgìre as aonais ministear aig an àm agus dh'aontaich e a dhol os cionn a' choitheanal airson trì bliadhna.

Phòs Mgr MacAmhlaigh agus a bhean Catriona ann an 1958 's bha sianar chloinne aca. Fhad 's a bha e na mhinistear air na Lochan ghabh e ùidh ann an obair na comhairle sgìreil agus bha e cuideachd na chomhairliche air Comhairle sgìre Rois is Chrombaidh bho 1969 gu 1974. Sheas e an uairsin airson a' chiad taghadh de chomhairlichean aig Comhairle nan Eilean Siar ann an 1974, agus chaidh a thaghadh mar a' chiad neach-gairm air a’ chomhairle a' bhliadhna sin.
Chaidh urram OBE a bhuileachadh air Mgr MacAmhlaigh ann an 1981 agus anns a' Chèitean 2004 chaidh urram Saorsa nan Eilean a bhuileachadh air fhèin agus air a dheagh charaid Mgr Calum MacIllFhialain.

Bhàsaich Mgr MacAmhlaigh aig aois 79 anns an Fhaoilleach 2006.