´óÏó´«Ã½

Ann an Dèanamaid Adhradh air an t-seachdain seo cluinnidh sibh na sailm agus an leughadh a leanas:
Salm 119: 58-60 air fonn Kilmarnock agus ‘ s e Dòmhnall A MacLeòid a tha os cionn na seinn le taic bho choitheanal Eaglais Shaor Chrosboist .

Salm 68: 19-20 air fonn Torwood agus ‘s e an t-Urr Coinneach Fearghasdan a tha os cionn na seinn le taic bho choitheanal Eaglais Shaor Naomh Chaluim Chille ann an Dùn Èideann .

Leughadh: Eòin 14: 1-19
Ceann-teagaisg: Eòin 14: 6

'S e Sgalpach a th' ann an Dòmhnall Iain, agus mar a thuirt e fhèin, "rugadh agus thogadh mi san àite as brèagha de dh'Alba agus am pìos as fheàrr dha na Hearadh". Tha Dòmhnall Iain pòsta aig Heidi, a tha às an Òlaind agus tha triuir chloinne aca.

Mus deach Dòmhnall Iain gu Seamanaraidh na Diadhachd ann an Lunnainn, bha e gu mòr an sàs ann an obair-leasachaidh anns an sgìre aige fhèin agus e air fhastadh aig Companaidh Leasachaidh na Hearadh Earranta airson còig bliadhna. Anns an ùine sin bha e an sàs ann am pròiseactan leasachaidh anns a'
choimhearsnachd, a' toirt a-staigh còrr air dà mhillean not de thaic airgid bhon roinn phoblaich agus phrìobhaidich airson pròiseactan a bha nam buannachd dhan sgìre a bha e a' riochdachadh.

Dh' fhàg e a dhreuchd ann an dà mhìle agus chaidh e gu Colaiste na Diadhachd ann an Lunnainn far an do chuir e seachad trì bliadhna. Tha Dòmhnall Iain air a bhith na Chrìosdaidh bho 1988, às dèidh tubaist le càr far an do chaill boireannach a beatha. Tha e an-dràsta na mhiseanaraidh dachaigh aig an Eaglais Shaor Leantainneach ann an Inbhir Nis agus mar phàirt den obair aige bidh e siubhail gu diofar sgìrean ann an Alba, agus air feadh an t-saoghail, a' toirt an t-soisgeil gu aire dhaoine. Gu math tric 's ann a-muigh air an t-sràid a bhios e a' searmonachadh.