´óÏó´«Ã½

Dòchas, misneach, àite airson a h-uile duine air a phàirce, ‘s chan eil aois neo meud dol a chur bacadh ort! Dè an còrr a dh’iarradh tu, ach a dhol còmhla ri Gillebrìde ‘s a chlann nighean. Cò th’ann an Gillebrìde? Uill, mar Ghàidheil chan eil sinn a’ cluinntinn an ainm ro thric na làithean sa agus nuair a chluinneas, bithear an dùil gun cluinn sinn òran neo dàn air choireigin aig fear MacIlleMhaoil! Chan aithne dha Angela NicFhionghuin gu seinn an Gillebrìde tha sa phrògram seo, ach tha aon rud cinnteach, bheir e air an luchd-taic agus na cluicheadairean air a' phàirce seinn - sin ma bhios e a' gabhail comhairle agus ma bhios smachd ceart ac' air.

Gillebrìde - sin am bàlla a bhios iad a' cleachdadh air pàirce rugbaidh, am bàlla a chruthaich fear Uilleam Gilbert cho fada air ais ri toiseach an naoidheamh linn deug. A' chlann-nighean - clann-nighean Sgioba Rugbaidh Mnathan Steòrnabhaigh. Buidheann chaileagan a thàinig còmhla an toiseach mu thrì bliadhna air ais, gun fiù ’s fios aig cuid aca dè a dhèanadh iad le Gillebrìde nuair a nochd iad an toiseach, ach cha robh fada gus an robh iad air an tàladh thuige seachdain às dèidh seachdain. An-diugh tha iad nan sgioba misneachail, a’ fàs nas làidire gach seachdain agus a dùblachadh nan àireamhan thairis air a' bhliadhna mu dheireadh. Chan e sin a-mhain, chan e dìreach geamannan càirdeil a tha fainear dhaibh a-nise, ach farpaisean is lìog rugbaidh.