´óÏó´«Ã½

Anns an t-seirbheis seo cluinnidh sibh na sailm agus an leughadh a leanas:

Salm 103: 11-13 air fonn Moravia agus ‘s e an t-Urr Niall Seathach a tha os cionn na seinn le taic bho choitheanal Eaglais nam Manach-liath ann an Inbhir Nis.

Salm 68: 18-19 air fonn Montrose agus ‘s e Uilleam Moireach a tha os cionn na seinn le taic bho choitheanal Eaglais Shaor a’ Bhac.

Salm 68: 15-16 air fonn Evan agus ‘s e an t-Urr Seumas Dòmhnallach a tha os cionn na seinn le taic bho choitheanal Eaglais Shaor a’ Bhac.

Leughadh: Leabhar an Taisbeanaidh 1: 1-10
Ceann-teagaisg : Leabhar an Taisbeanaidh 1:7

Rugadh Mgr MacIlleathain ann an 1931 ann am baile Shiaboist. Fhuair e fhoghlam san sgoil ionadail gus an robh e ceithir bliadhna deug agus an uair sin chuir e seachad dà bhliadhna a' dèanamh a Sheirbheis Nàiseanta ann am Feachd an Adhair. Chaidh iompachadh sa bhliadhna 1952 's thog e fianais air taobh Chrìosd ann an 1953. Dà bhliadhna às dèidh sin dh' fhairich e gu robh Dia ga ghairm dhan mhinistrealachd 's thill e dhan fhoghlam a' dèanamh cùrsa an toiseach ann an Colaiste Sgeiridh an Dùn Èideann eadar 1957 agus 1959. Chaidh e às an sin a dh' Oilthigh Obar Dheathain mus deach e gu Colaiste na h-Eaglaise Saoire ann an Dùn Èideann ann an 1961. Chaidh a phòsadh ri coitheanal Loch Carrain ann an 1965 agus ann an 1973 ghabh e ri gairm bho choitheanal Tholastaidh bho Thuath, an eilean àraich, far an robh e gus na leig e dheth a dhreuchd ann an 1996. Bha Mgr MacIllEathain pòsta aig Sandra 's bha triùir nighean aca.

Às dèidh dha a dhreuchd a leigeil dheth chaidh Mgr MacIlleathain 's a bhean air ais a dh' fhuireach ann am baile àraich ann an Siabost. Bha ùidh mhòr aige ann a bhith siubhail, agus bhiodh e fhèin sa bhean a' falbh gu math tric - eadar a bhith a' tadhal air a' chlann-nighean aca san dùthaich seo, gu bhith gabhail làithean-saora thall thairis. Nuair a bhiodh e aig an taigh bhiodh e trang anns a' ghàrradh a' fàs lusan.

Chaochail an t-Urr Calum MacIllEathain air an18mh den Mhairt am-bliadhna. Bha e air a bhith a’ dèanamh sheirbheisean Gàidhlig air an rèidio airson còrr air leth-cheud bliadhna.