´óÏó´«Ã½

Anns an t-seirbheis cluinnidh sibh na sailm agus an leugadh a leanas:

Salm 103: 1-2 air fonn Dundee agus 's e Alasdair MacNeacail a tha os cionn na seinn le taic bho choitheanal Eaglais Shaor Steòrnabhaigh.

Salm 144: 12-13 air fonn New Cambridge agus ‘s e an t-Urr Seumas MacÌomhair a tha os cionn na seinn le taic bho choitheanal Eaglais Shaor Crow Road ann an Glaschu.

Leughadh: Eòin 1: 1-29
Ceann-teagaisg: Salm 92: 4

Rugadh Daibhidh MacAonghais ann an sgìre Leumrabhaigh air taobh a Deas nan Lochan ann an Leòdhas. Fhuair e foghlam ann an Sgoil Leumrabhaigh agus Sgoil MhicNeacail.
Nuair a bha e ann an Dùn Èideann ann an 1954, thàinig atharrachadh na bheatha agus fhuair e eòlas air beatha Chrìosdaidh. Grunn bhliadhnaichean às dèidh sin thàinig faireachdainn làidir thuige gun robh aige ri ullachadh eile a dhèanamh na bheatha agus e fhèin a dheasachadh airson a bhith na mhinistear. B' e sin an t-slighe a lean e agus ann an 1961, chaidh e a dh’ Oilthigh Dhùn Èideann far an robh e airson sia bliadhna mus do cheumnaich e le teisteanas ann an Diadhaireachd agus Ealain.
Phòs Daibhidh Mairead NicLeòid à Baile Ailean ann an 1967 agus bha triùir de theaghlach aca, dithis nighean agus gille – Iseabail Ann, Marlene agus Calum.

As dèidh dha ceumnachadh ann an 1967 agus a fhuair e cead searmonachaidh aig Clèir Dhùn Èideann, chaidh e a fhrithealadh Eaglais Naomh Chaluim Chille ann am Baile Ghobhainn an Glaschu airson bliadhna. An ath bhliadhna as dèidh sin chaidh a phòsadh ri coitheanal Eaglais Cheann an Loch ann an Leòdhas far an robh e a’ searmonachadh airson naoi bliadhna. Ann an 1977 fhuair Mgr MacAonghais gairm gu Eaglais Sràid Gardner ann an Glaschu far an do chuir e seachad sia bliadhna deug.
'S e coitheanal Phaibeil ann an Uibhist a Tuath an coitheanal mu dheireadh a bha e a’ frithealadh mus do leig e dheth a dhreuchd ann an 1999. Bhàsaich Mgr MacAonghais anns a’ Chèitein 2018.