´óÏó´«Ã½

Air a' bhliadhna seo tha sinn a' comharrachadh gu bheil 70 bliadhna bho chaidh Sgoil Eòlais na h-Alba a stèidheachadh aig Oilthigh Dhùn Èideann. Tron bhliadhna, cluinnidh sinn taghaidhean de chuid de na chaidh a thogail le luchd-cruinneachaidh na Sgoile, a' mhòr-chuid dheth sna 50an agus na 60an, bho dhaoine a bh' air am bogadh ann an dualchas agus beul-aithris na Gàidhlig. Chaidh an t-sreath a chraoladh an toiseach nuair a bha an Sgoil a' comharrachadh 50 bliadhna ann an 2001.

Tha Murchadh Dòmhnallach, a bha a' cur rian air na bh' ann an Cruinneachadh Chanaigh do dh' Urras Nàiseanta na h-Alba, a' toirt thugainn cuid de na h-òrain a thug An Dr Iain Latharna Caimbeul, 'Fear Chanaigh', do Sgoil Eòlais na h-Alba.

Bha Fear Chanaigh air fear dhan fheadhainn a stèidhich Sgoil Eòlais na h-Alba aig deireadh 1951 agus thug e cuideachd tiodhlac de faisg air 300 òran a chlàr e fhèin agus a cho-obraichean dhan a' Sgoil.

Am measg na chluinneas sibh tha Ceit Ruaraidh ‘an Bhàin à Eòlaigearraidh am Barraigh le 'Tha caolas eadar mi ’s Iain', Bha a h-athair air a chlàradh ann a 1938 le Fear Chanaigh air Presto J6 Disc recorder, a bha am measg na ciad òrain a chaidh a chlàradh le dealan sna h-Eileanan an Iar.

Cluinnidh sinn cuideachd Bean Dhòmhnaill Iain Mhic IllFhaolain à Gèirinis an Uibhist a Deas le Nach freagair thu Chairstìona? ; Màiri agus Anna Mhìcheil Nèill à Barraigh a' gabhail DiSathairne ghabh mi mulad; Peigi Anndra, à Gleann Dail a' seinn Coisich agus Faigh Dhomh Cèile, An t-Each Odhar agus An Ràcan a bh’ Againne; Peigi Nèill ’icSteafain à Gleann Dail a' gabhail Duan na Càisg agus Donnchadh Dòmhnallach, Donnchadh mac Dhòmhnaill 'ic Dhonnchaidh ( Donnchadh Clachair ) à Peighinn an Aoireann le Tàladh Dhòmhnaill Ghuirm.

Chaidh an leabhar, Songs Remembered in Exile, mu thuras a rinn Fear Chanaigh a Cheap Breatainn fhoillseachadh ann a 1937, òran luaidh anns a’ chuid bu mhotha dhiubh, agus Hebridean Folk Songs, trì leabhraichean de dh'òrain luaidh, a chur an clò às dèidh sin.

Thurchair Iain Latharna Caimbeul air Mairead Fay Sheathach ann an Uibhist a Deas ann an 1924 fhads a bha i a’ cruinneachadh òrain Ghàidhlig 's i a' fuireach còmhla ri Peigi agus Màiri Anndra à Gleanndail, clann Anndra na h-Àirigh Mollaich. Chaidh 270 òran a chlàradh bho Pheigi a-mhàin.